Qazaqstanda memlekettik rámizderi el aýmaǵynda ǵana jasalýy tiis. Bul týraly QR Mádeniet jáne sport ministri Aqtoty Raiymqulova málimdedi, dep habarlaidy QazAqparat.
«Ruqsattar jáne habarlamalar týraly Zańǵa sáikes, el aýmaǵyndaǵy memlekettik rámizderdi daiyndaý litsenziialanatyn qyzmet bolyp tabylady. Bul shyǵarylatyn ónimniń memlekettik standarttarǵa sáikestigin qamtamasyz etedi. Sonymen qatar, otandyq naryqta elden tysqary jerde daiyndalǵan memlekettik rámizder de bar. Aitalyq, 2019 jyldyń 8 aiynda olardyń import kólemi 3,4 mlrd teńgeni quraǵan. Bul máseleni sheshý úshin shikizat satyp alýdy qospaǵanda, daiyndaýshylarǵa arnalǵan biliktilik talaptaryn, olardy eldiń aýmaǵynda óndirýdiń tolyq tsiklin qamtamasyz etý týraly normamen tolyqtyrý arqyly memlekettik rámizderdiń importyna tyiym salý qajet», - dedi ministr Aqordada Memlekettik rámizder men vedomstvolyq jáne olarǵa teńestirilgen ózge de nagradalar geraldikasy máseleleri jónindegi respýblikalyq komissiia otyrysynda.
Onyń aitýynsha, daiyn ónimdi shetelden satyp alatyn resmi daiyndaýshylardan litsenziiany qaitaryp alý jumystary júrip jatyr. Bul salada ýákiletti organdar – Saýda jáne integratsiia, Qarjy ministrlikteri biliktilik talaptaryna ózgerister engizý boiynsha shuǵyl sharalar qabyldai bastady.
«Máselen, bul baǵytta memlekettik rámizderdiń resmi óndirýshilerine monitoring júrgizildi. Onyń qorytyndysy boiynsha, 63 litsenziattyń 29-y ǵana biliktilik talaptaryna sai bop shyqty. Osy oraida ýákiletti organ – Saýda jáne integratsiia ministrligi sala kásiporyndaryna josparly tekserý júrgizip, biliktilik talaptaryna sai emes 34 litsenziatqa memlekettik rámizdi jasaýǵa tyiym salýy tiis. Ne olardyń jumysyn durys baǵytqa burý jóninde naqty nusqaý berýi kerek», - dedi Aqtoty Raiymqulova.
Osyǵan orai, komissiia tóraǵasy, Memlekettik hatshy Qyrymbek Kósherbaev rámizderdi daiyndaýshylarǵa arnalǵan biliktilik talaptaryn kúsheitý arqyly olardy el aýmaǵynda ǵana óndirýdiń tolyq tsiklin qamtamasyz etýdi jáne olardyń importyna tyiym salýdy tapsyrdy.
