Qazaqstan musylmandary dini basqarmasynyń tóraǵasy Serikbai qajy Oraz Ramazan aiynyń qai kúni bastalatyndyǵyn resmi jariia etti, dep habarlaidy QazAqparat tilshisi.
«Kele jatqan qasietti Ramazan aiy barshamyzǵa qutty, berekeli bolǵai! Biyl Qazaqstan musylmandary dini basqarmasy ǵulamalar keńesiniń sheshimimen shariǵat erejelerinde aidy kórip, Orazan bekitý jáne otandyq astrofizikalyq zertteýler ortalyǵynyń negizderine súiene otyryp, 16 mamyr keshki alǵashqy taraýih namazy oqylady. 17 mamyr ramazan aiynyń birinshi kúni bolyp bekitildi. Tolyǵyraq aqparattar resmi saitymyzda beriledi. Kele jatqan Ulyq ai barshamyzǵa qutty, berekeli bolsyn!», - delingen Qazaqstan musylmandary dini basqarmasy taratqan Bas múftidiń qazaqstandyqtarǵa arnaǵan úndeýinde.
Ramazan aiynyń bastalýyn naqty anyqtaý shariǵi úkimder men astronomiialyq esepter negizinde júzege asady. Alǵashqy kezeńde musylmandar jańa týǵan aidy kózben kóretin. Ǵylym men tehnologiia damyǵan zamanda musylmandyq kúntizbe shariǵi úkim men ǵylymi zertteýler negizinde jasaldy.
Paiǵambarymyz Muhammed (oǵan Allanyń salaýaty men sálemi bolsyn): «Orazany aidyń týýyna qarap bastap, aidyń týýyna qarap aiaqtańdar. Eger ai kórinbese, shaǵban aiyn otyz kúnge toltyryp, bastai berińder», - degen.
Demek, musylman jurtshylyǵy ramazannan buryn bolatyn shaǵban aiynyń jiyrma toǵyzy kúni keshke qarai jańa aidyń (ramazannyń) týýyn kútýleri kerek. Jańa ai kórinse, onda kelesi kúni oraza ustaidy. Eger kórinbese, sol aidy otyz kúnge toltyryp, orazany bastaidy. Birqatar musylman memleketteriniń ǵalymdary osy hadiste aitylǵan shaǵban aiynyń 29-ynshy kúni 15 mamyrǵa, al 30-ynshy juldyzy 16 mamyrǵa sai keletinin málimdeýde. Demek, astronomiialyq esepter 16 mamyrda jańa aidyń týylatynyn kórsetýde. Al 17 mamyr - ramazan aiynyń alǵashqy kúni bolyp esepteledi.
Qazaqstan musylmandary dini basqarmasy elimizdegi irgeli zertteý ortalyqtarynyń biri bolyp tabylatyn «Ulttyq ǵaryshtyq zertteýler men tehnologiialar ortalyǵy» mekemesinen jańa aidyń kórinýine qatysty resmi málimet suratty. Atalmysh mekeme 16 mamyrda astronomiialyq quraldar kómegimen jańa aidy kórýge bolatynyn málimdedi.
Osyǵan orai, QMDB Ǵulamalar keńesi shariǵi úkim men otandyq astronomiialyq ǵylymi zertteý nátijesin negizge ala otyryp: «17 mamyr - Ramazan aiynyń birinshi kúni», - degen sheshim qabyldady.
