Tennisten AQSh-tyń ashyq chempionatynyń finalynda ispaniialyq Rafael Nadal reseilik Daniil Medvedevti tize búktirdi, dep habarlaidy "Ult aqparat".
Jarys Niý-Iorktegi Ulttyq tennis ortalyǵynyń «hard» jabyndysy tóselgen kortta rynda ótti.
Týrnirdiń besinshi raketkasy, 23 jastaǵy reseilik sportshy Nadalden 5:7, 3:6, 7:5, 6:4, 4:6 esebimen jeńilip qaldy. Bul sportshylardyń ekinshi ret kezdesýi. 11 tamyz kúni Medvedev Nadal Monrealdegi týrnirdiń finalynda qarsylasyp, 3:6, 0:6 esebimen jeńilip qalǵan edi.
Kásibi tennisshiler qaýymdastyǵynyń (ATR) reitinginde ekinshi orynda turǵan 33 jastaǵy Nadal US Open chempionatynda osymen tórtinshi ret jeńiske jetti. Sondai-aq, ol Roland Garros chempionatynda on eki márte, «Ýimbldonda» eki ret jáne Australian Open-de bir márte jeńiske jetken. Osylaisha Nadal Úlken dýlyǵa týrnirleriniń 19 márte jeńimpazy atanǵan. Ispaniialyq tennisshi dál osy kórsetkishpen ekinshi orynǵa ornalasty. Birinshi orynda jiyrma márte úzdik atanǵan shveitsariialyq Rodjer Federer tur.
AQSh-tyń ashyq chempionaty - Úlken dýlyǵa týrnirleri maýsymynda tórtinshi ári qorytyndy jarys. Biyl júlde qory $57 mln qurady. Nadal jeńisi úshin $3,85 mln, Medvedev $1,9 mln aldy. Senbi kúni áielder arasyndaǵy synnyń finalynda 19 jastaǵy kanadalyq Bianka Andreeský amerikalyq Serena Ýiliamstan ailasyn asyrǵan bolatyn. 2018 jyly erler arasyndaǵy jekelei týrnirde serbiialyq Novak Djokovich jeńimpaz atanǵan edi.
