Qyzylorda oblysynyń Jańaqorǵan aýdanynda joǵalyp ketken 20 jastaǵy jigittiń máiiti qudyqtan tabyldy, dep habarlaidy ult.kz.
Qaiǵyly jaǵdaiǵa qatysty qylmystyq is qozǵalyp, marqumnyń kámeletke tolmaǵan týǵan inisi kúdikke ilingen.
Meiirjan Rústem 30 mamyr kúni túnde úiiniń aýlasynda uiyqtaǵan. Alaida tańerteń jaqyndary onyń joǵalyp ketkenin baiqaǵan. Týystary óz betterinshe izdeý jumystaryn júrgizip, jigittiń denesin bir táýlikten keiin úiinen shamamen 400 metr jerdegi jergilikti sý qubyrynyń qudyǵynan tapqan.
Týystarynyń aitýynsha, marqumnyń denesinde kógergen izder men moinynda jipke uqsas izder bolǵan. Kei derekte onyń denesi kórpege oralǵan kúide tabylǵany aitylǵan.
Qazirgi tańda qylmystyq is boiynsha marqumnyń 15 jastaǵy týǵan inisi kúdikti retinde qamaýǵa alynǵan. Alaida otbasy bul nusqamen kelispeidi. Týystary jasóspirimniń qylmysqa qatysy joq ekenin aityp, istiń barlyq mán-jaiy tolyq ári obektivti tekserilýin talap etip otyr.
