Atyraýda tórt adamnyń ólimine bailanysty atyshýly qylmystyq is boiynsha jańa málimetter paida boldy, dep habarlaidy ult.kz.
Iske qatysty aiyptalýshy Sultan Sársemalievtiń burynǵy jubaiy Aqbaian Muqanǵalieva Almaty qalasynda keshendi sot-psihiatriialyq jáne psihologiialyq saraptamadan ótken. Mamandar qorytyndysyna sáikes, oǵan dinamikalyq baqylaý júrgizý qajettiligi kórsetilgen. Sonymen qatar dárigerler qosymsha differentsialdy diagnostikalyq tekserýler taǵaiyndaǵan.
Resmi derekterge sáikes, 2026 jyldyń 27 sáýirinde oǵan qatysty Qylmystyq kodekstiń 99-baby 2-bóligi 1-tarmaǵy boiynsha qozǵalǵan is toqtatylǵan. Tergeý barysynda onyń áreketinen qylmys quramynyń belgileri anyqtalmaǵan.
Degenmen, azamatshaǵa qatysty quqyqtyq protsess tolyq aiaqtalǵan joq. Negizgi qylmystyq is aiasynda jeke óndiris bólinip, ol Qylmystyq kodekstiń 434-baby — «Qylmys týraly habarlamaý» baby boiynsha jaýapqa tartylýda.
Quzyrly organdar qazirgi tańda onyń is-áreketine qatysty túpkilikti quqyqtyq baǵa áli berilmegenin málimdedi. Bultartpaý sharasy qoldanylmaǵan.
Tergeý amaldary jalǵasýda. Istiń barlyq mán-jaiy tolyq ári jan-jaqty zerttelgennen keiin ǵana sońǵy protsessýaldyq sheshim qabyldanady.
Aita keteiik, Atyraý oblysynda tórt adamnyń ólimine bailanysty sot protsesi jalǵasyp jatyr. Aiyptalýshy oryndyǵynda Sultan Sársemaliev otyr. Sot barysynda Aqbaian Muqanǵalievanyń esimi oqiǵaǵa deiingi jáne keiingi jaǵdailarǵa qatysty jii atalyp keledi.
