Qazaqstannyń aralas jekpe-jek ónerindegi eń tanymal sportshylardyń biri Qýat Hamitov Almaty oblysynyń kúres federatsiiasy vitse-prezidenti qyzmetine taǵaiyndaldy, dep habarlaidy ult.kz.
Federatsiia ókilderi onyń jańa qyzmetke ne sebepti tańdalǵanyn túsindirdi.
Ótken aptada Almaty oblysynyń kúres federatsiiasynda birden úsh jańa vitse-prezident taǵaiyndalǵan. Olardyń qatarynda Qýat Hamitovpen birge kásipker Ersultan Bóbei, Qazaqstan kýboginiń eki dúrkin jeńimpazy Álibek Ábdiqasymov bar.
«Qýat, eń aldymen, grek-rim kúresimen ainalysqan, sport sheberi. Ol Almaty oblysynda kúrespen shuǵyldanǵan. Sondyqtan osy jerde týyp-ósken adamnyń búginde týǵan ólkesine paidasyn tigizýge múmkindigi bar dep esepteimiz. Onyń sporttaǵy bedeli men kópshilikke tanymaldyǵy federatsiiaǵa, jarystarǵa jáne sportshylarymyzǵa qosymsha nazar aýdarýǵa, jastar arasynda kúresti nasihattaýǵa jáne aýditoriiany keńeitýge kómektesedi», – dedi federatsiia ókilderi.
Federatsiia baspasóz qyzmeti Qýat Hamitovtyń kásibi sportshy retinde úlken sporttyq jáne ómirlik tájiribe jinaǵanyn atap ótti.
38 jastaǵy Qýat Hamitov Qazaqstandaǵy aralas jekpe-jek sportynyń tanymal ókilderiniń biri. Ol Alash Pride jáne WBK ligalarynda chempion atanǵan.
