19-20 qyrkúiek kúnderi Almaty qalasyndaQazaqstan musylmandary dini basqarmasynyń uiymdastyrýymen «QMDB EXPO-2026» halyqaralyq kórmesi ótedi, dep habarlaidy ult.kz.
«QMDB EXPO-2026» – Qazaqstan musylmandary dini basqarmasynyń negizgi qyzmet baǵyttaryn, mekemeleri men jobalaryn, sondai-aq otandyq jáne sheteldik halal indýstriia ókilderin bir alańǵa toǵystyratyn aýqymdy shara.
Kórmeniń basty maqsaty – QMDB-nyń rýhani-aǵartýshylyq, qaiyrymdylyq, aqparattyq, baspa, qajylyq, halal indýstriiasy, ýaqyp, tsifrlandyrý jáne áleýmettik baǵyttardaǵy qyzmetin qoǵamǵa keńinen tanystyrý, jańa jobalar men bastamalardy kópshilik nazaryna usyný. Sonymen qatar kórme halal indýstriiasynyń damýyna serpin berip, otandyq jáne sheteldik kásipkerler arasynda tájiribe almasýǵa, iskerlik bailanysty nyǵaitýǵa múmkindik beredi.
Kórmege QMDB-ǵa qarasty «Halal Damý» standarttaý jáne sertifikattaý ortalyǵy, «Zeket jáne qaiyrymdylyq» qory, «Múftiiat» baspasy, «Munara» telearnasy, «Taýaf Trevel» qajylyq kompaniiasy, «Iman» jýrnaly, «Munara» gazeti, «Ýaqyp» qory, «Qamqor-Sharapat» ortalyǵy, «Darhan Dala» jobasy jáne ózge de mekemeler qatysady. Ár mekeme óziniń atqaryp jatqan jumysyn, jańa jobalary men qyzmetterin arnaiy kórme alańdarynda tanystyrady.
«QMDB EXPO-2026» kórmesiniń mańyzdy baǵyttarynyń biri – tsifrlandyrý men zamanaýi tehnologiialar. Kórme barysynda QMDB qyzmetine engizilip jatqan tsifrlyq jobalar men tehnologiialyq sheshimder tanystyrylyp, din salasyndaǵy tsifrlandyrýdyń jańa múmkindikteri usynylady.
Kórmeniń taǵy bir aýqymdy bóligi halal indýstriiasyna arnalady. Munda Qazaqstannyń iri kásiporyndarymen qatar sheteldik óndirýshiler óz ónimderin usynady.
Atap aitqanda, Ózbekstannan Craffers, Alif, ASL CORN, Tanho, PUFFI, ARDENT FOODS, ISKO, Candy Gold, Boost Food, Qyrǵyzstannan«Kýlikov», «Toiboss», Qytaidan Wedrink kompaniialary qatysady.
Otandyq óndirýshiler qatarynda Arai East Food, «Emil», Zigi-Zagi, «Kýblei», «Nárlen», Happy Cake, Lalu Cake, «ULAN», «Lengerskoe», «Bijan», «Alel Agro», «Alataý Qus» jáne basqa da kásiporyndar bar.
Kelýshiler kórme barysynda et jáne qus ónimderi, sút ónimderi, konditerlik ónimder, sýsyndar, jartylai fabrikattar, taǵam qospalary jáne basqa da halal ónimderdiń keń assortimentimen tanysa alady. Ónimderdi óndirýshilerden tikelei satyp alýǵa múmkindik qarastyrylǵan.
Kórme aiasynda QMDB Tóraǵasy, Bas múfti Naýryzbai qajy Taǵanulynyń qatysýymen resmi ashylý rásimi ótedi. Sondai-aq úzdik halal kásiporyndardy marapattaý, otandyq jáne sheteldik mamandardyń qatysýymen halal standarttaý jáne sertifikattaý salasyna qatysty kezdesýler men dárister ótkizý josparlanǵan.
Budan bólek, eki kún boiy rýhani-aǵartýshylyq kezdesýler, mazmundy suhbattar, arnaiy tanystyrylymdar men túrli is-sharalar uiymdastyrylady.
«QMDB EXPO-2026» – Dini basqarmanyń búgingi qyzmetimen jaqynyraq tanysyp, jańa bastamalar men zamanaýi jobalardy bir alańnan kórýge, halal indýstriiasynyń otandyq jáne halyqaralyq ókilderimen tanysýǵa múmkindik beretin mańyzdy alań.
Kórmeniń ótetin ýaqyty:
19-20 qyrkúiek 2026 jyl, saǵat 09:00-18:00.
Ótetin orny:
Almaty qalasy, Timiriazev kóshesi, 42, «Baqshasarai» saltanat saraiy.
Kirý tegin.
