Biologiialyq qaýipsizdik máseleleri ǵylymi-zertteý institýtynyń bas direktory Kúnsulý Zakaria QazAqparat tilshisine QazVac vaktsinasynyń Shveitsariiada tirkelý múmkindigi týraly aityp berdi, dep habarlaidy QazAqparat.
QazVac vaktsinasyn oilap taýyp, endi delta-shtamyna beiimdeý arqyly jetildirip jatqan zertteýshiler tobynyń jetekshisi Kúnsulý Zakaria qazaqstandyq ekpeni Dúniejúzilik densaýlyq saqtaý uiymynda tirkeý áli de biraz ýaqytty, tynymsyz eńbekti qajet etetinin aitady.
Aqparat keńistigine QazVac-tyń COVID-19 virýsynyń delta-shtamyna qarsy nusqasy jasalǵany týraly aqparatpen birge Jambyl oblysyndaǵy zaýytqa DDSU-dan ókilder kele jatqany týraly málimet qatar tarady. Ǵylymi-zertteý institýynyń bas direktory bul eki máseleniń bir-birimen esh bailanysy joq ekenin basa aitty.
«Ras, qazir búkil dúniejúzi virýstyń delta-shtamynan tiimdi vaktsina jasaý máselesine bas qatyryp jatyr. «Spýtnik V»-diń delta-shtamǵa modifikatsiiasy shyǵaryldy. AQSh ta delta-shtammen jumys istep jatyr. Olardiki de, bizdiki de ázirge zertteý deńgeiinde. Densaýlyq saqtaý ministrliginen áli ruqsat alǵan joqpyz. Olar qarap jatyr. Jaqyn ýaqytta ruqsat beremiz degen. Sony kútip otyrmyz», - deidi ǵalym.
Onyń aitýyna qaraǵanda, Dúniejúzilik densaýlyq saqtaý uiymynan Jambyl oblysyna kele jatqan ókilder QazVac ekpesin shyǵaratyn zaýyttyń jumysymen tanysyp qana qaitady.
«Olar GMP sertifikaty boiynsha keledi. Qazaqshalap aitsaq, óndiristik praktikanyń qanshalyqty osy standartqa sai ekenin óz kózderimen kórmekshi. Bizdiń vaktsina Dúniejúzilik densaýlyq saqtaý uiymyna tirkelý úshin eń birinshi halyqaralyq sertifikat alý kerek. Halyqaralyq sertifikatty almasaq, bizdiń qujattardy qarastyrmaidy. Olar bizdegi zaýytpen tanysýǵa kele jatyr. Ázirge zaýyt salǵanymyzdy sózben estip qana júr ǵoi. Bul jerde eshteńe sheshilmeidi. Jai ǵana qonaq retinde kele jatyr dep túsiný kerek. Zaýyttyń jumysymen tanysyp, baqylaidy. Sodan keiin ǵana tirkeý týraly naqty jospar ázirlenedi», - deidi Kúnsulý Zakaria.
Sondai-aq, ol QazVac-tyń Shveitsariiada tirkelý múmkindigi týraly pikir bildirdi.
«Shveitsariiada tirkelý máselesine kelsek, ózderi bizdiń Syrtqy ister, Saýda jáne integratsiia ministrlikterine shyǵyp habarlasqan bolatyn. Sondyqtan qazir solarmen jumys istep jatyrmyz. Óitkeni ózderi qyzyǵýshylyq tanytty. Kim bailanysqa shyqsa, solarmen jumys istep jatyrmyz. Mysaly qasymyzda baýyrlas elder bar. Qyrǵzystannan basqalary eshqandai usnyspen shyqqan joq. Al alystaǵy Shveitsariia ózderi shyǵyp, «kómekteseiik, tirkeýden ótseńizder Afrika, Latyn Amerikasyna shyǵarýǵa bolady» degendei máselelerdi aityp, bailanysty», - deidi Biologiialyq qaýipsizdik máseleleri ǵylymi-zertteý institýtynyń bas direktory.
