QR Premer-Ministriniń orynbasary Eraly Toǵjanov QazVac qazaqstandyq vaktsinasyn Dúniejúzilik densaýlyq uiymynda tirkeý merzimi týraly saýalǵa jaýap berdi, dep habarlaidy QazAqparat.
«Sizder túsinýlerińiz kerek. Naqty ólshemder bar. Qazaqstan basynda Ulttyq retteýshiniń birinshi deńgeiinde bolǵan. Segiz aidyń ishinde ekinshi deńgeige shyqtyq. Endi sony 2022 jyldyń aiaǵyna qarai úshinshi deńgeige jetkizý mindeti qoiylyp otyr. Qazaqstan Ulttyq retteýshiniń úshinshi deńgeiine jetken kezde bizdiń vaktsinany Dúniejúzilik densaýlyq saqtaý uiymy resmi túrde qaraityn bolady. Bul – halyqaralyq standarttar, bul – talap», -dedi ol BAQ ókiliniń saýalyna bergen jaýabynda.
Aitýynsha, memleket munymen shektelip otyrǵan joq.
«Búginde álemniń 25 elimen bizdiń vaktsina pasporttaryn ózara moiyndaý týraly kelisim bar. Bul baǵytta syrtqy ister ministrlikterimen, elshiliktermen naqty ári dáiekti jumys júrgizilip jatyr.
Bizdiń vaktsina buǵan deiin de aitylǵandai, 86-dan 90 paiyzǵa deiin tiimdilik kórsetip otyr. Sondyqtan ony kóbi moiyndaýda. Ol jaiyn óz mamandarymyzdan taǵy da naqtylai alasyzdar», - dedi Úkimet basshysynyń orynbasary.
«Sonda DDSU qazaqstandyq vaktsinany 2022 jyldyń sońynan erte tirkemeidi degen sóz be» dep surady BAQ ókili.
«Iá, ulttyq retteýshiniń úshinshi deńgeiine qol jetkizgen sátten bastap tirkeý bastalady. Qazir ol qaraýda jatyr ǵoi. Biraq ol úshin elimiz, Ulttyq retteýshi úshinshi deńgeige jetýi kerek. Sondyqtan uiymǵa múshe elderdiń bárine qoiylatyn negizgi talap osy», - dedi Eraly Toǵjanov.
