Biologiialyq qaýipsizdik máseleleri jónindegi ǵylym-zertteý institýtynyń bas direktory Kúnsulý Zakariia koronavirýsqa qarsy qazaqstandyq QazCovid-in (QazVac) vaktsinasyn klinikalyq synaqtan ótkizýdiń qorytyndy úshinshi satysy qalai ótip jatqandyǵyn aityp berdi, dep habarlaidy QazAqparat.
«Úshinshi saty jalǵasyp jatyr. Búginde úshinshi saty synaqtary 90 paiyzǵa aiaqtaldy, sodan keiin ýaqytsha tirkeýge sáikes meditsinalyq qoldanýǵa ruqsat berildi. Biz alǵashqy toptamasyn shyǵardyq. Kúni keshe ǵana, 25 mamyrda institýt qosymsha 50 myń dozany «SQ Farmatsiia» habtaryna jóneltti», - dedi ol QazAqparat tilshisine telefon arqyly bergen suqbatynda.
Onyń atap ótýinshe, klinikalyq synaqtyń úshinshi satysy elimizdiń Densaýlyq saqtaý ministrligi bekitken hattamaǵa sáikes júrgizilip jatyr.
«Búginde atalǵan hattamadan aýytqý bolǵan joq. Úshinshi saty osy jyldyń 9 shildesinde aiaqtalady. Úshinshi saty aiaqtalǵannan keiin málimetterge úlken saraptamalyq óńdeý júrgiziledi. Bul asqan dáldikti talap etetin aýyr protsess jáne shilde aiynyń sońynda zertteýdiń barlyq satysyna qatysty qorytyndy esep bolady. Ony bekitilgen tártippen Densaýlyq saqtaý ministrligine usynamyz», - dedi Kúnsulý Zakariia.
