Qazaqstanda elektrondyq saýda alańdary men internet-jarnama arqyly ornalastyrýǵa jáne satýǵa tyiym salynǵan nemese shekteý qoiylǵan taýarlardyń tizimi bekitildi, dep habarlaidy ult.kz.
Qazaqstanda elektrondyq saýda alańdary men internet-jarnama arqyly ornalastyrýǵa jáne satýǵa tyiym salynǵan nemese shekteý qoiylǵan taýarlardyń tizimi bekitildi.
Qujat 32 sanattaǵy taýardy qamtidy. Onda marketpleisterde qandai ónimderdi satýǵa bolmaityny jáne qandai talaptarmen satylatyny naqty kórsetilgen.
Tizimniń basym bóligin qarý-jaraq túrleri quraidy. Olar ainalymy shekteýli jáne tolyq tyiym salynǵan qarýlar bolyp ekige bólinedi.
Ainalymy shekteýli qarýlarǵa mehanikalyq shashyratqyshtar, aerozoldi qurylǵylar, oqsyzdandyrylǵan jáne dabyl beretin qarýlar, sýyq qarýlar, elektrshokerler, pnevmatikalyq jáne atys qarýlary jatady. Mundai taýarlardy tek 18 jasqa tolǵan azamattarǵa jáne litsenziiasy bar zańdy tulǵalar – qarý-jaraq dúkenderi ǵana sata alady. Al atys qarýyn satyp alý úshin ishki ister organdarynyń arnaiy ruqsaty qajet.
Al azamattyq jáne qyzmettik maqsatta qoldanýǵa tolyq tyiym salynǵan qarýlardyń qataryna kalibri 4,5 millimetrden joǵary pnevmatikalyq qarýlar, oqjatar syiymdylyǵy 10 oqtan asatyn uzyn uńǵyly qarýlar, avtomatty qarýlar, basqa zattarǵa uqsatyp jasalǵan qarýlar, laqtyrylatyn qarýlar, júzi avtomatty túrde shyǵatyn ári uzyndyǵy 90 millimetrden asatyn pyshaqtar, bron buzatyn, jandyrǵysh nemese jarylǵysh oqtar, sondai-aq áseri radioaktivti nemese biologiialyq faktorlarǵa negizdelgen qarýlar engizilgen. Sonymen qatar metall izdegish quraldarmen anyqtalmaityn materialdan jasalǵan jáne kriminalistikalyq talaptarǵa sáikestigin rastaityn qujattary joq qarýlardy satýǵa bolmaidy. Bul talaptardyń oryndalýyn Ishki ister ministrligi baqylaidy.
Temeki ónimderin, onyń ishinde qyzdyrylatyn temeki ónimderin, kalian temekisin jáne temekini qyzdyrý júielerin satýǵa ruqsat etiledi. Alaida olardy 21 jasqa tolmaǵan adamdarǵa, ashylǵan qoraptan bólshektep satýǵa, saýda avtomattary arqyly ótkizýge, sondai-aq densaýlyq saqtaý, bilim berý uiymdary men sport nysandarynyń aýmaǵynda satýǵa tyiym salynady.
Al tútinsiz temeki ónimderi, elektrondyq temekiler (veipter), olarǵa arnalǵan suiyqtyqtar men hosh iistendirgishterdi ákelýge, óndirýge, saqtaýǵa, tasymaldaýǵa, taratýǵa jáne satýǵa tolyq tyiym salynǵan. Bul baǵyttaǵy baqylaýdy Mádeniet jáne aqparat ministrligi júzege asyrady.
Etil spirti men alkogol ónimderine qatysty da birqatar shekteýler engizilgen. Tehnikalyq reglament talaptaryna sáikes kelmeitin, qańyltyr ydystaǵy, zattańbasy nemese aktsizdik markasy joq alkogol ónimderin satýǵa bolmaidy.
Sondai-aq alkogoldi 21 jasqa tolmaǵandarǵa satýǵa, araq pen kúshti alkogol ónimderin eń tómengi bólshek saýda baǵasynan tómen baǵamen ótkizýge tyiym salynady. Budan bólek, alkogol ónimderin saǵat 23:00-den tańǵy 08:00-ge deiin, al quramyndaǵy spirt mólsheri 30 paiyzdan joǵary sýsyndardy saǵat 21:00-den kelesi kúngi 12:00-ge deiin satýǵa bolmaidy. Bul shekteý meiramhanalarǵa, barlarǵa, kafelerge jáne jolaýshylar kóligine qoldanylmaidy.
Sekseýil aǵashynan jasalǵan ónimder de tizimge engizildi. Ekologiia jáne tabiǵi resýrstar ministriniń 2024 jylǵy 30 qazandaǵy buiryǵyna sáikes, memlekettik orman qory aýmaǵyndaǵy sekseýil ormandaryn kesýge qoiylǵan tyiym merzimi aiaqtalǵanǵa deiin mundai ónimderdi satýǵa bolmaidy. Tyiym 2028 jyldyń 31 jeltoqsanyna deiin kúshinde bolady.
Janýarlardan alynatyn ónimderge qatysty da talaptar kúsheitildi. Veterinariialyq-sanitariialyq saraptamadan ótpegen et, sút, jumyrtqa jáne ózge de ónimderdi satýǵa tyiym salynady. Aýyl sharýashylyǵy janýarlaryn soiý kezinde mindetti túrde veterinariialyq anyqtama bolýy tiis. Sondai-aq jeti táýlikten artyq saqtalǵan et pen sýbónimderdi ótkizýge ruqsat etilmeidi.
Budan bólek, Qazaqstanda memlekettik tirkeýden ótpegen jáne sáikestik sertifikaty joq dárilik zattar men meditsinalyq buiymdardy kóterme nemese bólshek saýdada satýǵa tolyq tyiym salynǵan.
