Qazaqstanda Memlekettik Tý, Eltańba jáne Ánurandy paidalaný qaǵidalaryna ózgerister engizildi. Jańartylǵan talaptar memlekettik rámizderdi paidalaný tártibin naqtylap, olarǵa degen qurmetti kúsheitýge baǵyttalǵan, dep habarlaidy ult.kz.
Endi normativtik quqyqtyq aktilerde burynǵy «Gimn» ataýynyń ornyna «Ánuran» termini qoldanylady.
Sondai-aq Memlekettik Týdy ornalastyrý tártibi naqtylandy. Jeke jáne zańdy tulǵalar Týdy ǵimarattarǵa, sonyń ishinde balkondarǵa 45 gradýs buryshpen ile alady. Bul múmkindik zańnamada buryn bolǵanymen, balkonǵa ornalastyrý tártibi alǵash ret naqty kórsetildi.
Jańa talaptarǵa sáikes, jeke turǵyn úilerde Memlekettik Tý jerden keminde úsh metr biiktikte ornatylýy tiis. Sonymen birge Týdy túnde jaryqtandyrý mindeti alynyp tastaldy. Eger ǵimarattyń qasbetine Tý ilý múmkin bolmasa, ony aýladaǵy arnaiy tý tuǵyryna ornatýǵa ruqsat etiledi.
Qaǵidalarda Týdyń jerge, edenge nemese sýǵa tiiýine jol berilmeitini taǵy bir márte naqtylandy. Sonymen qatar óńi ketken, jyrtylǵan nemese búlingen Memlekettik Týdy paidalanýǵa tyiym salynady. Memlekettik rámizder týraly zań talaptary saqtalǵan jaǵdaida Týdy avtokólik salonynda ornalastyrýǵa da ruqsat berilgen.
Jańashyldyqtardyń biri – sportshylardyń kiimi men jabdyqtaryna Memlekettik Týdyń beinesin ornalastyrýǵa ruqsat etilýi. Buǵan deiin sporttyq kiimde tek Memlekettik Eltańbany qoldanýǵa bolatyn. Endi bul quqyq Memlekettik Týdyń beinesine de berildi.
Al Memlekettik Týdy jarnamalyq maqsatta paidalanýǵa, sondai-aq ony kiim-keshekke, tósek-orynǵa, perdege, dastarqanǵa, tósenishke jáne basqa da turmystyq buiymdarǵa ornalastyrýǵa burynǵydai tyiym salynady.
Mádeniet jáne aqparat ministrliginiń málimetinshe, engizilgen ózgerister memlekettik rámizderdi paidalaný tártibin birizdendirip, azamattar, uiymdar, sportshylar men kásipkerler úshin ortaq talaptardy aiqyndaýǵa múmkindik beredi.
