Qazaqstanda inkliýzivti bilim berýdi damytý baǵytyndaǵy mańyzdy jobalardyń biri – «e-Ymdaý» ym-isharattyq tiliniń beine sózdigi resmi túrde qoldanysqa engizildi, dep habarlaidy ult.kz.
Joba QR Oqý-aǵartý ministrliginiń «Arnaiy jáne inkliýzivti bilim berýdi damytýdyń ulttyq ǵylymi-praktikalyq ortalyǵy» RMM ǵylymi-ádistemelik keńesi men Mektepke deiingi jáne orta bilim komitetiniń qoldaýymen júzege asyrylýda.
Jańa tsifrlyq resýrs estý qabileti buzylǵan balalar men eresekterdiń bilim alýyna, qarym-qatynas jasaýyna jáne qoǵam ómirine belsendi aralasýyna múmkindik beredi.
«e-Ymdaý» beine sózdiginiń ereksheligi – sózder men uǵymdardy ym-isharattar arqyly kórneki túrde usynatyn interaktivti derekter bazasyna negizdelýi. Avtomattandyrylǵan izdeý júiesiniń kómegimen paidalanýshylar qajetti sózdi jyldam taýyp, onyń durys ym-isharattyq nusqasymen tanysa alady.
Beine sózdik qazaq jáne orys tilderinde qoljetimdi. Ony App Store qosymshasy arqyly júkteýge nemese Arnaiy jáne inkliýzivti bilim berýdi damytýdyń ulttyq ǵylymi-praktikalyq ortalyǵynyń resmi saity arqyly onlain formatta paidalanýǵa bolady.
«e-Ymdaý» sózdigi 21 leksikalyq taqyrypty qamtidy.
«e-Ymdaý» beine sózdigi estý qabileti buzylǵan azamattardyń aqparatqa qoljetimdiligin keńeitýge, ym-isharattyq tildi úirenýdi jeńildetýge jáne inkliýzivti bilim berý sapasyn arttyrýǵa baǵyttalǵan. Jobanyń iske qosylýy erekshe bilim berý qajettiligi bar azamattardyń sapaly bilim alýyna jáne qoǵam ómirine tolyqqandy qatysýyna qosymsha múmkindik beredi.
