Qazaqstanda balalardyń damýyndaǵy buzylystardy erte anyqtap, der kezinde kómek kórsetýge baǵyttalǵan damý jáne erte aralasý ortalyqtarynyń jelisi keńeiip keledi, dep habarlaidy Ult.kz.
Densaýlyq saqtaý ministrliginiń málimetinshe, sońǵy bir jyldyń ishinde meditsinalyq-sanitariialyq alǵashqy kómek uiymdarynyń bazasynda 386-dan astam osyndai ortalyq jumysyn bastady.
Ministrlik balalar densaýlyǵyn qorǵaýdaǵy negizgi basymdyqtardyń biri retinde profilaktikalyq kómekti kúsheitý men damý erekshelikterin erte kezeńde anyqtaýdy atap ótti.
Elimizde osy maqsatta balanyń dúniege kelgen sátinen bastap erte jasyna deiin keshendi qoldaý kórsetýdi kózdeitin «Alǵashqy 1001 kún» jobasy júzege asyrylyp jatyr. Joba aiasynda patronaj qyzmeti jetildirilip, skriningtik baǵdarlamalar keńeitiledi, ana sútimen qorektendirýdi qoldaý sharalary kúsheitiledi jáne erte jastaǵy balalardyń ulttyq tirkelimi qalyptastyrylady.
Sondai-aq 2025 jyldan bastap Qazaqstanda Dúniejúzilik densaýlyq saqtaý uiymynyń (DDU) balalardyń damýyn monitoringileýge arnalǵan GMCD nusqaýlyǵy engizilýde. Bul qural damý kidirisiniń qaýpin klinikalyq belgiler baiqalmai turyp anyqtaýǵa múmkindik beredi.
Jańa ortalyqtarda dárigerler, logopedter, psihologter, reabilitologter jáne ózge de mamandardan quralǵan mýltidistsiplinarlyq toptar jumys isteidi. Olar balalarǵa keshendi kómek kórsetýmen qatar, ata-analarǵa bala kútimi men damýyna qatysty keńes berip, barlyq kezeńde qoldaý kórsetedi.
Mamandardyń aitýynsha, erte aralasý balalar múgedektiginiń qaýpin tómendetip, olardyń ómir sapasyn jaqsartýǵa jáne qoǵamǵa tabysty beiimdelýine múmkindik beredi. Neǵurlym kómek erte bastalsa, balanyń áleýetin tolyq ashý múmkindigi soǵurlym joǵary bolady.
