Qazaqstanda 2026 jyldyń alǵashqy toǵyz aiynda 356 myń jeke kásipker esepten shyǵaryldy. Olardyń 42,6 paiyzy 2025 jyly tabys tappaǵan, al 20,8 paiyzy kásipkerlik qyzmetin jalǵastyryp, ózin-ózi jumyspen qamtyǵandar rejimine kóshken. Bul týraly Premer-ministrdiń orynbasary – ulttyq ekonomika ministri Serik Jumanǵarin málimdedi, dep habarlaidy ult.kz.
Ministrdiń aitýynsha, 2026 jylǵy qańtar-qyrkúiek aralyǵynda 277 myń jańa kásipkerlik sýbektisi tirkelgen. Onyń ishinde 34,7 myńy – zańdy tulǵa, 242,3 myńy – jeke kásipker.
Osy kezeńde 19,7 myń zańdy tulǵa men 356 myń jeke kásipker esepten shyǵarylǵan.
Serik Jumanǵarin jeke kásipkerlikti tirkeýdi toqtatý árdaiym biznestiń tolyq jabylǵanyn bildirmeitinin atap ótti. Máselen, kásipkerlerdiń bir bóligi qyzmetin jalǵastyra otyryp, salyq rejimin ózgertken.
Kásipkerlik sýbektileriniń jalpy sany ósken
Vitse-premerdiń málimetinshe, ózin-ózi jumyspen qamtyǵan azamattardy qosa eseptegende, Qazaqstandaǵy kásipkerlik sýbektileriniń jalpy sany 32,5%-ǵa ósip, 3,2 millionǵa jetken.
Jalpyǵa birdei belgilengen salyq rejiminde jumys isteitin, qosylǵan qun salyǵyn tóleýshi kásipkerlerdiń sany da 28%-ǵa artqan.
Sonymen qatar, ózin-ózi jumyspen qamtyǵandarǵa arnalǵan rejimde 981 myń adam tirkelgen. Olardyń 807 myńy alǵash ret salyq esebine turǵan.
