Búgin Astanadaǵy Ortalyq kommýnikatsiialar qyzmetinde «Qazaqstan» RTRK AQ basqarma tóraǵasy Erlan Qarin men «Qazsport» telearnasynyń direktory Pavel Tsybýlinniń qatysýymen «Qazaqstan» jáne «Qazsport» telearnalarynyń UFC jekpe-jekterin kórsetý quqyǵyna ie bolýyna bailanysty baspasóz máslihaty ótti.
Alǵash bolyp sóz alǵan Erlan Qarin: «Qazaqstan» teleradiokorporatsiiasy búkilálemdik UFC sport uiymynyń jekpe-jekterin Qazaqstan aýmaǵynda bir jarym jyl boiy kórsetý quqyǵyna ie boldy. 2018 jyldyń qyrkúiek pen jeltoqsan ailary aralyǵynda «Qazaqstan» jáne «Qazsport» telearnalarynda UFC-tiń 14 jekpe-jegi efirge shyǵady. Sonyń ishinde, 6 qazan kúni Las-Vegasta ótetin irlandiialyq Konor MakGregor men reseilik Habib Nýrmogomedovtyń arasynda ótetin UFC229 keshi de kórsetiletin bolady. Al, 2019 jyly 40-tan astam týrnirdiń kórsetilimi josparlanyp otyr. Jekpe-jek keshteriniń negizgi kórsetiliminen bólek, Qazaqstandaǵy belgili MMA mamandarynyń qatysýymen túrli stýdiialyq baǵdarlamalar men ataqty UFC sportshylary týraly arnaiy habarlar daiyndalady. Atalǵan kelisim-shart elimizde osy sport túriniń damýymen qatar, qazaqstandyq sportshylardyń halyqaralyq deńgeide daiyndalýyna septigin tigizetin bolady», - dedi.
«Sondai-aq, biz 16 qyrkúiek kúni barsha qazaqstandyqtar asyǵa kútip júrgen Golovkin men Alvares arasyndaǵy boks keshin kórsetetin bolamyz. Al, 20 qyrkúiekten bastap bizdiń arnalarymyzda «Qazaqstan FIGHTER» jobasynyń tusaýkeseri bolmaq. Bul jobada jas sportshylar aralas jekpe-jekten Qazaqstannyń eń myqty sportshysy» ataǵy úshin synǵa túsetin bolady. Jobanyń maqsaty - Qazaqstandaǵy aralas jekpe-jek sportyn damytý» ,- dedi Pavel Tsybýlin.
Aita ketsek, Ultimate Fighting Championship (UFC) - aralas jekpe-jek sportynda jyldam damyp kele jatqan sporttyq uiym. Bas keńesi AQSh-tyń Las-Vegas qalasynda ornalasqan. Búginde UFC-diń kez-kelgen jekpe-jek keshi álemniń túkpir-túkpirinen júzdegen telearnalar men milliondaǵan jankúierlerdi jinaityn aýqymdy sharaǵa ainalǵan.
