Pavlodar oblysyndaǵy Qazaqstan-Resei shekarasynda ornalasqan «Qosaq» ótkizý pýnktinde júk kólikteriniń kezegi ulǵaiyp, keptelis qalyptasty, dep habarlaidy ult.kz.
Ulttyq qaýipsizdik komitetiniń málimetinshe, jaǵdai jemis-jidek pen kókónis ónimderin tasymaldaý kóleminiń maýsymdyq artýyna bailanysty týyndaǵan.
Vedomstvo kútý ýaqytyn qysqartý úshin ótkizý pýnkti kúsheitilgen rejimde jumys istep jatqanyn málimdedi. Sondai-aq jergilikti atqarýshy organdarmen birlesip qajetti sharalar qabyldanýda.
UQK málimetine sáikes, «Qosaq» ótkizý pýnktiniń Qazaqstannan shyǵý baǵytyndaǵy ortasha ótkizý qabileti táýligine 200-220 júk kóligin quraidy.
Osyǵan bailanysty tasymaldaýshylarǵa balamaly baǵyttardy paidalanýǵa keńes berildi. Pavlodar oblysynda «Sharbaqty» jáne «Úrlitóbe» halyqaralyq ótkizý beketteri jumys istese, Soltústik Qazaqstan oblysynda «Jańa Jol», «Qaraqoǵa» jáne «Qyzyl Jar» ótkizý pýnktteri arqyly shekaradan ótýge bolady.
Sonymen qatar shekaradan ótý ýaqytyn aldyn ala josparlaýǵa múmkindik beretin elektrondyq kezek júiesi qoldanysta. Ol bos oryndardyń bar-joǵyn tekserýge jáne ótkizý beketterine túsetin júktemeni azaitýǵa múmkindik beredi.
UQK júrgizýshiler men júk tasymaldaýshylardy qalyptasqan jaǵdaidy eskerip, qozǵalys baǵytyn aldyn ala josparlaýǵa shaqyrdy.
