«Qazaqstan» telearnasynda maýsym boiy kórermenniń kózaiymyna ainalǵan «Qazaqstan daýysy» jobasy aiaqtaldy. Úzdikterdiń úzdigi iriktelgen jobanyń sońǵy shyǵarylymynda finalister tikelei efirde 2 án shyrqady, dep habarlaidy atalǵan telearnanyń baspasóz qyzmeti.
Ár úmitker bir ándi jeke, birin tálimgerlerimen birge oryndap shyqty. Iaǵni aqtyq synda tálimgerler de bir-birimen básekege tústi. Al jobanyń jeńimpazy kórermenniń daýysy arqyly anyqtaldy.
SMS-daýys berý nátijesi boiynsha:
1-oryn – Quralai Meirambek
2-oryn – Erik Tólenov
3-oryn – Ernar Amandyq
4-oryn – Arýjan Aidarbek ielendi.
Sáken Maiǵazievtiń shákirti «Qazaqstan daýysy» jobasynyń 2021 jylǵy jeńimpazy atanyp, 5 million teńge ielendi. Sonymen birge «Qazaqstan» teleradiokorporatsiiasy Quralaidyń ónerine ári qarai qoldaý bildiredi. Osylaisha jarty jylǵa jýyq kórermenin qýantqan baǵdarlama óz máresine jetti.
«Qazaqstan daýysy» - álemniń 140 elinde kórsetilgen áigili «The Voice» teleshoýynyń qazaqstandyq nusqasy. Mýzykalyq baǵdarlama kórermenge jarty jyl boiy usynylyp, reiting boiynsha kósh bastap keldi. Jobaǵa uzyn-sany 6 myńnan asa adam qatysty. Onyń ishinde ózge memleketten arnaiy kelgen talanttar da boldy.
Jalpy, «Kórmei tańdaý» kezeńine 100 shaqty úmitker ótti. Odan soń qatysýshylar «Jekpe-jek», «Jarǵa jyǵý», tikelei efirdegi kezeńderinde baq synap, finalǵa 4 tálimgerdiń 4 úzdik shákirti joldama aldy.
