Qazirgi tańda elimizde 26 518 sport nysany jumys isteidi. Halyqtyń sport infraqurylymymen qamtylý deńgeii 59,6%-dy quraidy. Al aýyldyq jerlerde bul kórsetkish 62,1%-ǵa jetken. Bul óńirlerde sport nysandary jelisiniń turaqty túrde keńeiip kele jatqanyn kórsetedi, dep habarlaidy ult.kz.
Ministrlik zamanaýi stadiondar salýǵa da erekshe kóńil bólip otyr. Búginde Qazaqstanda 30 iri stadion bar. Sonymen qatar taǵy 15 stadionnyń qurylysy júrgizilip jatyr.
Qazirgi ýaqytta Almaty, Aqtóbe, Atyraý, Shymkent jáne Semei qalalarynda jańa stadiondar salynyp jatyr. Bul nysandardy 2028-2029 jyldary paidalanýǵa berý josparlanǵan. Budan bólek, taǵy jeti stadionnyń jobalyq-smetalyq qujattamasy ázirlenip jatyr. Taraz qalasynda jańa stadion salýǵa jer telimi belgilense, Qostanai jáne Ulytaý oblystarynda jobalardy iske asyrý máselesi qarastyrylyp jatyr.
Sport infraqurylymyn damytý jumystary iri sport keshenderiniń qurylysyn da qamtidy. 2024 jyly 90 sport nysany paidalanýǵa berildi. Onyń 61-i aýyldyq jerde ornalasqan. 2025 jyly 147 sport nysanynyń qurylysy aiaqtaldy, onyń 107-si aýyldyq eldi mekenderde salyndy. 2026 jyly taǵy 121 sport nysanyn paidalanýǵa berý josparlanyp otyr.
Sonymen qatar 2026 jyldan bastap Ministrlik 2026-2028 jyldarǵa arnalǵan sport infraqurylymyn damytý jónindegi jol kartasyn iske asyrýǵa kiristi. Qujat aiasynda 86 investitsiialyq jobany, onyń ishinde 56 jobany aýyldyq jerlerde júzege asyrý kózdelgen.
Balalar jáne buqaralyq fýtboldy damytý da negizgi basymdyqtardyń biri bolyp qala beredi. Memleket basshysynyń tapsyrmasyna sáikes Ministrlik ákimdiktermen birlesip, balalarǵa arnalǵan fýtbol alańdaryn salý baǵdarlamasyn júzege asyryp jatyr. 2025 jyly elimizde 520 fýtbol alańy paidalanýǵa berildi. Onyń 378-i aýyldyq jerlerde ornalasqan. Biyl bul jumystar respýblika boiynsha jalǵasyp jatyr.
Atalǵan jobalardy iske asyrý zamanaýi sport infraqurylymynyń qoljetimdiligin arttyryp, halyqtyń dene shynyqtyrýmen jáne sportpen turaqty ainalysýyna múmkindik beredi. Sondai-aq buqaralyq, balalar jáne jasóspirimder sportyn elimizdiń barlyq óńirinde odan ári damytýǵa serpin beredi.
