Qazaqstan teleradiokorporatsiiasynyń Almaty qalasyndaǵy 24 qyzmetkerinen, sondai-aq "Atameken" ulttyq kásipkerler palatasynda tájiribeden ótip jatqan adamnan koronavirýs anyqtaldy. Bul týraly Almaty qalasy taýarlar men qyzmetter sapasyn jáne qaýipsizdigin tekserý departamenti habarlady.
"Qazaqstan" TRK-de koronavirýs infektsiiasynyń 24 jaǵdaiy tirkeldi. Kásipkerler palatasynda aýrý taralǵan joq, tájiribeden ótip jatqan bir adamnan infektsiia tabyldy", - dep habarlady departamenttiń baspasóz qyzmeti.
Almatydaǵy "Qazaqstan" TRK Jeltoqsan kóshesi, 177 mekenjaiynda, Sátbaev kóshesiniń qiylysynda ornalasqan.
Sanitar dárigerler "Qazaqstan" TRK-daǵy naýqastar qyzmetkerlerge aýdandyq basqarmamen birlesip profilaktikalyq tekserý júrgizý kezinde anyqtalǵanyn jetkizdi.
COVID-19 juqtyrǵandarmen, sondai-aq bailanyssyz naýqastarmen tikelei qarym-qatynas jasaǵan barlyq adam tekserildi, dep naqtylady vedomstvo.
Sonymen qatar, "Qazaqstan" TRK-men bir ǵimaratta ornalasqan jáne kireberisi ortaq "Eýraziia birinshi arnasynyń" qyzmetkerleri de tekserýden ótken.
Ázirge virýs juqtyrǵandardyń qanshasy jýrnalist ekeni belgisiz.
22 mamyr kúni Nur-Cultan qalasynda birneshe buqaralyq aqparat quraly ornalasqan “Qazmedia ortalyǵynan” koronavirýs juqtyrǵandar anyqtalyp, qatań karantin tártibi engizilgen. Ortalyqta ornalasqan “Eýraziia” arnasynyń eki qyzmetkerinen koronavirýs tabylǵan edi.
Aita keteiik, 6 maýsym Qazaqstan Prezidenti Qasym-Jomart Toqaevtyń baspasóz hatshysy Berik Ýáli de ózine koronavirýs juqqanyn habarlaǵan.
Resmi derek boiynsha, Qazaqstanda COVID-19 aýrýy 12 859 adamnan anyqtalǵan. Densaýlyq saqtaý ministrligi 6 maýsymnan bastap koronavirýs juqtyryp, biraq boiynda aýrýdyń belgileri joq adamdardy resmi statistikaǵa qospaitynyn málimdedi. Ministrliktiń aitýynsha, elde aýrý belgileri joq adamdardyń sany – 1357.
Qazaqstanda koronavirýs juqtyrǵan alǵashqy adam 13 naýryzda tirkelgen. 7484 adam jazylyp shyqty. 56 adam koronavirýstan qaitys boldy.
