Elordada «Qazaqstan» teleradiokorporatsiiasy jobalarynyń jańa maýsymy tanystyryldy, dep habarlaidy QazAqparat.
«Qazaqstan» RTRK» AQ basqarma tóraǵasy Lázzat Tanysbai ulttyq arnanyń 61-shi maýsymy ashylatynyn eske saldy jáne jańa jobalar jóninde baiandady.
«Eń aldymen tikelei efirde kópshiliktiń qatysýymen, kórermenniń aralasýymen boiamasyz ótetin jobalardy kóbeittik. Maqsat – talapshyl da synshyl aýditoriiamyzdyń suranysyna jaýap berý. Mysaly, kún saiyn keshki saǵat 20:30-da qoǵamda qyzý talqyǵa túsken máselelerdi Ulttyq arnanyń tikelei efirinde «Ashyq alañ»-nan kóre alasyzdar. «Ashyq alañ»-da qoǵam ókilderi men Úkimettiń túrli býyndaryndaǵy jaýapty tulǵalar kezdesip, máseleni ashyq talqylaidy. Oǵan kórermenderimiz belsendi túrde atsalysýda. Bir efirde tek Whatsapp messendjeri arqyly 4 myńnan asa suraq túsip, bir saǵatta myńnan astam qońyraý shalyndy», - dedi L. Tanysbai.
Sonymen birge, media menedjer retinde uiym basshysy «Niet» jobasynyń erekshe mańyzdy ekenin jetkizdi.
«Baiqasańyzdar, bizdiń qoǵamda kómekke muqtaj adam kóp, sonymen qosa, kómekteskisi keletinder de jetkilikti. Tek joldaryn bile bermeidi. Mine, sondai adamdardy biriktiretin «Niet» áleýmettik jobasyn ashýdaǵy maqsatymyz – sapaly televiziialyq shoý jasaý ǵana emes, kez kelgen qiyn jaǵdaidan birlese shyǵýǵa múmkindik bar ekenin kórsetý. 9 qyrkúiekten bastap efirge jol tartqan jobanyń keshegi habarynda stýdiiamyzda kópbalaly bir otbasy baspanaly boldy. Biz aqsha jinamaimyz, stýdiiaǵa kelgen adamǵa baǵdarlamany kórip otyrǵan árbir qazaqstandyq kómek kórsete alady», - dedi spiker.
TNS Central Asia zertteý kompaniiasynyń derekteri boiynsha, «Qazaqstan» ulttyq arnasynyń reitingtik kórsetkishteri kóktemmen salystyrǵanda 121 paiyzǵa ósken.
«Bul – búkil ujymnyń jaz boiǵy tynymsyz eńbeginiń nátijesi. Qara shańyraqtaǵy sabaqtastyqty saqtaý - bizdiń paryzymyz. Bul maýsymda 14 jańa jobanyń tusaýyn kessek, kórermenniń joǵary baǵasyna ie bolǵan 10 baǵdarlama jalǵasyn tabady. «Tañsholpan», «Dara jol», «Másele», «Parasat maidany» siiaqty baǵdarlamalardy da qaita usynyp otyrmyz. Salamyzdyń basshysy ministr myrza aldymyzǵa úlken talap qoiyp otyr. Qazaqy rýhani qundylyqtardy saqtai otyryp, naryqtyq nátijelerge, básekelestikke kóńil bólýimiz kerek», - dedi Lázzat Tanysbai.
Aita keteiik, kúzgi jańa maýsymda «Qazaqstan» Ulttyq arnasynan 14 jańa joba efirge shyǵady. Osyǵan deiin kórermen yqylasyna bólenip úlgergen 10 baǵdarlama jańasha formatta qaita usynylady.
