«Qazaq Air» áýe kompaniiasy halyqaralyq baǵyttarǵa ushýǵa ruqsat aldy.
«Azamattyq aviatsiia komiteti halyqaralyq áýe tasymaly jelisin keńeitý jumystaryn jalǵastyryp jatyr. Konkýrs komissiiasynyń «Qazaq Air» áýe kompaniiasy ótinishterin qaraýy nátijesinde kompaniiaǵa halyqaralyq áýe baǵyttaryna ushýǵa ruqsat kýáligi berildi. «Qazaq Air» áýe kompaniiasy halyqaralyq áýe tasymalyn júzege asyrýdy josparlap otyr», - dep habarlady Azamattyq aviatsiia komiteti.
Kompaniia aldaǵy ýaqytta kelesi baǵyttar boiynsha ushýdy júzege asyrmaqshy: Almaty - Bishkek - Almaty; Almaty - Osh - Almaty; Atyraý - Astrahan - Atyraý; Atyraý - Mineralnye Vody - Atyraý; Atyraý - Tbilisi - Atyraý; Aqtaý - Tbilisi - Aqtaý; Aqtaý - Groznyi - Aqtaý; Óskemen- Novosibir - Óskemen.
Naýryz merekesi qarsańynda, 2019 jyldyń 21 naýryzy kúni Almaty - Bishkek baǵytyndaǵy alǵashqy sapar júzege asyrylady. Al odan keiin kórshiles eldiń astanasyna áýe kompaniiasynyń ushaqtary aptasyna eki ret qatynaityn bolady.
Aita keteiik, «Qazaq Air» áýe kompaniiasy IOSA sertifikatyn ala otyryp, halyqaralyq qaýipsizdik talaptaryna sai ekenin dáleldedi.
