Briýsselde Memleket basshysy Qasym-Jomart Toqaev Eýropalyq Keńes Prezidenti Antoniý Koshtamen jáne Eýropalyq Komissiia Prezidenti Ýrsýla fon der Liaienmen mańyzdy kelissózder júrgizdi, dep habarlaidy Ult.kz.
Kezdesý barysynda Prezident ózara senim men qurmetke negizdelgen ekijaqty qarym-qatynastardyń deńgeii búginde tarihta bolmaǵan biikke jetip, shynaiy strategiialyq sipat alǵanyn málimdedi.
Qasym-Jomart Toqaev Briýssel saparynyń basty maqsaty — eki tarapqa da tiimdi barlyq baǵyttar boiynsha bailanystardy tereńdetý ekenin aityp, jańadan qabyldanǵan kelisimder men memorandýmdar yqpaldastyqtyń jańa kezeńine jol ashatynyna senim bildirdi.
Prezident Qazaqstan men Eýroodaq arasynda joǵary deńgeidegi saiasi dialogtyń berik qalyptasqanyn tilge tiek etip, elimizdiń Ortalyq Aziia óńirinde birinshi bolyp EO-men Keńeitilgen seriktestik pen yntymaqtastyq jónindegi kelisimdi bekitkenin eske saldy.
Kelissózderde saýda-ekonomikalyq jáne investitsiialyq yqpaldastyqty nyǵaitý máselesine erekshe ekpin berildi. Memleket basshysy EO elimizdiń eń iri saýda jáne investitsiialyq seriktesi ekenin, al eýropalyq kompaniialardyń qazaqstandyq naryqtaǵy tabysty jumysy sheteldik biznestiń memleketimizge degen zor senimin kórsetetinin atap ótti.
Qazaqstan Eýropalyq Odaqtyń aimaqtaǵy basty ári senimdi seriktesi bolýdy maqtan tutady jáne sheteldik investorlar úshin qolaily ári turaqty investitsiialyq ortany saqtaýǵa aldaǵy ýaqytta da kúsh salmaq.
