2015 jyldyń 24 naýryzynda Ispaniianyń Barselona qalasynan Germaniianyń Diýsseldorf qalasyna bet alǵan Germanwings 9525 reisi Frantsiianyń ońtústigindegi Alpi taýlaryna soǵylyp, borttaǵy 150 adamnyń barlyǵy – 144 jolaýshy men 6 ekipaj múshesi qaza tapty. Bul Eýropa aviatsiiasy tarihyndaǵy eń sumdyq ári qoǵamdy dúr silkindirgen oqiǵalardyń biri retinde este qaldy, dep habarlaidy ult.kz.
Ushaq áýege kóterilgennen keiin shamamen jarty saǵat ótkende kapitan ushqysh kabinadan ýaqytsha shyǵyp ketken. Sol sátte kabinada qalǵan ekinshi ushqysh Andreas Lýbits esikti ishinen jaýyp, kapitandy qaita kirgizbegen. Kabinadaǵy dybys jazǵyshtan kapitannyń esikti qaita-qaita qaǵyp, keiin ony buzýǵa áreket jasaǵany anyq estilgen. Alaida esik ashylmaǵan.
Osy kezde ushaq birtindep tómendei bastaǵan. Áýe dispetcherleri ekipajmen birneshe ret bailanysýǵa tyrysqanymen, eshqandai jaýap ala almaǵan. Ushaqtyń ishinde otyrǵan jolaýshylar sońǵy sátterde ne bolyp jatqanyn túsinip, úreige boi aldyrǵany týraly tergeý materialdarynda aityldy. Birneshe minýttan keiin Airbus A320 ushaǵy shamamen 700 km/saǵjyldamdyqpen Frantsiia Alpisiniń jartasyna soǵylyp, túgeldei byt-shyt boldy. Aman qalǵan eshkim bolǵan joq.
Tergeý barysynda qara jáshikterdegi jazbalar zerttelip, apattyń tehnikalyq aqaýdan emes, ekinshi ushqyshtyń qasaqana áreketinen bolǵany anyqtaldy. Belgili bolǵandai, Andreas Lýbits buryn psihologiialyq qiyndyqtarǵa tap bolyp, depressiiadan em qabyldaǵan. Keiin onyń jumysqa jaramsyz ekeni týraly dáriger anyqtamalaryn jyrtyp tastaǵany jáne bul týraly jumys berýshige habarlamaǵany belgili boldy.
Bul qaiǵyly oqiǵadan keiin álemniń kóptegen áýe kompaniialary qaýipsizdik erejelerin qaita qarady. Sonyń ishinde, kóptegen elderde ushqysh kabinasynda árdaiym keminde eki adam bolýy tiis degen talap engizildi. Sondai-aq ushqyshtardyń psihologiialyq jaǵdaiyn baqylaý kúsheitilip, meditsinalyq tekserýlerdiń tártibi qatańdatyldy.
