Qaraǵandy oblysynda áreket etken «Takorp» qarjy piramidasynyń qyzmeti áshkerelendi, dep habarlaidy ult.kz.
Oblys prokýratýrasynyń úilestirýimen Ekonomikalyq tergep-tekserý departamenti biyl qarjy piramidalaryn qurý jáne olarǵa basshylyq etý faktileri boiynsha úsh qylmystyq is tirkegen.
Aldyn ala málimetterge sáikes, zańsyz shemaǵa 400-den astam salymshy tartylǵan. Al 2025 jyly qarjy piramidalaryna qatysty tórt sotqa deiingi tergep-tekserý bastalyp, olardyń saldarynan 50-den astam azamat zardap shekken. Keltirilgen shyǵyn kólemi 67 million teńgeden asqan.
Tergeý derekterine sáikes, «Takorp» uiymdastyrýshylary azamattardy salǵan qarajattyń 100 paiyzǵa deiingi mólsherinde jyldam tabys tabýǵa bolady degen ýádemen tartqan. Tólenetin syiaqy kólemi jańa qatysýshylardy júiege qosý jáne olardyń belsendiligine bailanysty bolǵan.
Tergeý barysynda kúdiktilerdiń ieligindegi 32 myń AQSh dollarynan astam somaǵa teń kriptovaliýtaǵa tyiym salyndy.
Sot úkimimen azamat «M» Qazaqstan Respýblikasy Qylmystyq kodeksiniń 217-baby 2-bóliginiń 1) jáne 4) tarmaqtary boiynsha kináli dep tanylyp, 3 jyl 6 ai merzimge bas bostandyǵynan aiyryldy. Alaida úkim ázirge zańdy kúshine engen joq.
Qaraǵandy oblysynyń prokýratýrasy azamattardy qarjy piramidalarynyń arbaýyna túspeýge shaqyryp, kepildendirilgen joǵary tabys týraly ýádelerge saqtyqpen qaraýǵa keńes berdi. Sondai-aq qarajat salmas buryn uiymdardyń qyzmetiniń zańdylyǵyn muqiiat tekserý qajettigin eskertti.
