Qyrǵyzstannyń burynǵy prezidenti Almazbek Atambaev Resei Prezidenti Vladimir Pýtinmen kezdesýi týraly aitty. Olar 24 shilde kúni Kremlde jolyqqan bolatyn.
Almazbek Atambaevtyń málimdemesimen onyń jaqtastary bólisti, - dep habarlaidy Sputnik Qyrǵyzstan.
"Resei Qyrǵyzstannyń dosy ári strategiialyq áriptesi ekenin taǵy bir márte dáleldedi. Alaida eldiń ishki máselelerin biz ózimiz sheshemiz", - dedi saiasatker.
Málimdemede túrli másele boiynsha kelispeýshilikti sheshý úshin eki tarap ta óz úlesin qosýy kerek ekeni aitylǵan.
"Bilik sotta isti qaraǵan kezde ádildik tanytýy kerek. Qarsylastardy saiasi qýdalaýdy toqtatqan durys. Jeenbekov tarapynan osyndai qadamdy kórgen kezde oppozitsiianyń kún tártibi birden ózgeredi", - dedi Qyrǵyzstannyń eks-prezidenti.
Onyń aitýynsha, bul ádis eldegi saiasi ahýaldy jaqsartýǵa sep bolady.
"Jeenbekovtyń el igiligi úshin jumys istei bastaǵanyn jáne oppozitsiianyń sailaýǵa daiyndalyp jatqanyn kórgen kezde ǵana halyq tynyshtalady. Saiasi turaqtylyq ornaidy. Biz bilik tarapynan naqty is-áreketti qyrkúiek aiyna deiin kútemiz", - dedi Atambaev.
Eske sala ketsek, 13 maýsym kúni Qyrǵyzstan parlamenti arnaiy komissiia qurǵan bolatyn. Komissiia Almazbek Atambaevtyń alty qylmysqa qatysy bar bolýy múmkin degen qorytyndy jasady. 20 maýsym kúni Jogorký Kenesh bul qorytyndyny maquldap, Bas prokýratýraǵa jibergen.
