Saha baqsysy Aleksandr Gabyshev Resei prezidenti Vladimir Pýtindi "Kremlden alastaý úshin" Máskeýge jańadan joryq bastaitynyn málimdedi. Ol jaqtastarymen birge naýryz aiynda jolǵa shyǵatynyn aitty.
Gabyshev sot sheshimine qaramastan joryq jasaitynyn aityp otyr.
"Men Qudai zańyna ǵana baǵynamyn. "Ol naýryz aiynda dedi, demek - naýryz aiynda" dedi baqsy Youtube-te jariialaǵan videomálimdemesinde. Ol jaqtastaryn Iakýtsk qalasynda jinap jatyr. Joryqty naqty qai kúni bastaitynyn aitqan joq.
Saha baqsysy Aleksandr Gabyshev 2019 jyly naýryz aiynda "Pýtindi Kremlden alastaý úshin" Máskeýge jaiaý shyqqan edi. Ol "Resei prezidenti qara kúshten jaralǵan jáne onymen tek baqsy ǵana kúrese alady" dep málimdegen. Ony politsiia Býriatiia men Irkýtsk oblysy shekarasynyń mańynan 19 qyrkúiekte alyp ketken.
20 qyrkúiekte Iakýtsk qalasyna ákelip, psihiatriialyq tekserýge jibergen. Psihologiialyq-psihiatriialyq saraptama qazan aiynyń basynda saha baqsysy Aleksandr Gabyshevtiń "aqyl-esi durys emes" degen qorytyndy shyǵardy.
Onyń ústinen "ekstremizm" babymen qylmystyq is qozǵap, eshqaida ketpeitini jóninde qolhat aldy. Resei prezidentiniń baspasóz hatshysy Dmitrii Peskov saha baqsysynyń ustalýyna "Kremldiń esh qatysy joǵyn" aitty.
Gabyshev ekinshi joryǵyn 8 jeltoqsanda bastaǵan. Biraq politsiia ony taǵy ustady. Tergeý oryndary oǵan eshqandai aiyp aqpady, bul joly eshqaida ketpeitini týraly qolhatty qaitaryp bergen.
FSB qyzmetkeri ony qajet jaǵdaida tergeýshige barýdy mindettegen.
Byltyr Amnesty International adam quqyǵyn qorǵaý uiymy Aleksandr Gabyshevti "ar-ujdan tutqyny" dep atap, Resei biligin saha baqsysyn bosatýǵa shaqyrǵan.
