YouTube arnasynda tanymal stendap-komik Rýslan Belyi biliktiń astyrtyn tyiymyna bailanysty biyl kúzge josparlanǵan bes kontsertiniń úsheýi ótpei qalǵanyn málimdedi, dep habarlaidy Azattyq.
16 qazanda Belyi Sankt-Peterbýrgtegi mádeniet úiinde kontsert ótkizýge tiis bolǵan, biraq qalalyq mádeniet komitetiniń sheshimimen toqtatylǵan.
Komiktiń sózinshe, oǵan aldyna ala ýádeleskenine qaramastan, Reseidiń Birinshi arnasyndaǵy "Vechernii Ýrgant" baǵdarlamasyna shyǵýǵa da tyiym salynǵan.
Ártis bul jaittardy óziniń saiasi taqyryptardy ájýa-qaljyńǵa jii ainaldyrǵanynan kóredi. Onyń qaljyńdaryna Vladimir Pýtinnen bastap, Reseidiń ózge de kóptegen joǵary laýazymdy tulǵalary ilikken. Belyi ózine qoiylǵan tosqaýyl Resei prezidentiniń ákimshiliginen túsip otyr dep sanaidy.
Ártistiń sózinshe, "kereksiz ártister" týraly prezident Pýtin ákimshiligi bekitken tizimge ilikken.
"Ártisterdi sary jáne qyzyl tizimge engizetinin estigenmin. Sarysy – "túsiniksizder", al qyzyly - "tyiym salynǵandar". Ózime resmi túrde aitqan emes. Bul bastama prezident ákimshiliginen shyǵyp jatqan siiaqty. Bul tizimnen shyǵý múmkin emes", – dedi Rýslan Belyi.
"Másele saiasi taqyrypty tuzdyq etken "Ózimiz ǵoi" ("Ia svoi") jáne "Murtymdy nege uzarttym" ("Pochemý ia otrastil ýsy") dep atalatyn ázil-syqaq kontsertim Youtube-qa shyqqannan keiin paida boldy" dep joramaldaidy ol. Bul kontsertterinde Belyi Resei sheneýnikteriniń "tynysh ahýaldy shaiqaýdyń keregi joq" ("ne nado raskachivat lodký") degen sózdi jii qoldanatynyn kúlkige ainaldyrǵan.
Keiingi jyldary Reseide bilikti synaǵan nemese saiasi máselelerdi ájýalaǵan ártister, mýzykanttar men stendap-komikter kásibi jumystarynda túrli kedergige ushyraityny ańǵarylǵan.
Taiaýda komik Idrak Mirzalizadeniń qoiylymy úlken rezonans týǵyzǵan edi. Quqyq qorǵaýshy organdar Mirzalizadeniń qaljyńyn "orys halqynyń ar-ojdanyna tietin qaljyń" dep baǵalaǵan. Osydan keiin Mirzalizadeni Reseige kirgizbeý jóninde sheshim qabyldaǵan. Qazir bul isti apelliatsiia soty qarap jatyr.
Pýtin týraly qaljyńdaǵan taǵy bir komik Denis Chýjoi da biliktiń qysym jasai bastaǵanyn habarlaǵan.
