Resei Prezidenti Vladimir Pýtin tamyz aiynda Severodvinskidegi synaq kezinde jarylyp, jeti adamnyń ólimine sebepshi bolǵan jańa qarýdy Resei báribir jetildire beredi dep málimdedi.
Beisenbi, 21 qarashada Kremlde Nenoksa poligonynda qaza tapqan adamdardyń týystaryna "Erlik" ordenin tapsyrǵan Pýtin apat jóninde túsinikteme berdi. Ol poligonda naqty qandai qarý synaqtan ótkenin aitpady. Biraq "Reseidiń qaýipsizdigin ondaǵan jyl qamtamasyz etetin álemde teńdesi joq qarý" dep sipattady. Pýtinniń sózinshe, "ýnikaldy tehnologiia álemde beibitshilikti saqtaýǵa kepildik beredi".
Buǵan deiin Resei Prezidenti "bolashaǵy zor" qarý júiesimen jumys barysynda jarylys bolǵanyn aitqan. Qorǵanys ministrligi jarylys radioizotopty energiia kózinen shyqty dep habarlady.
Azattyqtyń Orys qyzmeti jáne ózge birqatar BAQ ashyq derekterge súiene otyryp, jarylys sebepteri jaily boljam jariialaǵan. Qazan aiynda AQSh memlekettik departamenti Reseidiń Arhangelsk oblysyndaǵy poligonda bolǵan jarylys Aq teńizdiń túbinen iadrolyq qondyrǵysy bar "Býrevestnik" zymyranyn alyp shyǵý kezinde bolǵan degen qorytyndy jasady.
Tamyzdyń 8-ine bolǵan jarylysta "Rosatomnyń" bes qyzmetkeri, eki áskeri qyzmetker qaza bolyp, birneshe adam jaralandy. Olardyń keibirine radiatsiia sáýlesi ótkeni habarlandy. Severodvinskidegi jarylystan soń aimaqta radiatsiia deńgeii 16 esege ulǵaiyp, qalpyna túsken.
