Foto: yarnovosti.com
"Ýkrainaǵa tank bergenderge Reseiden "jaýap bolady". Áskeri tehnikany paidalanýmen sharýa sheshilmeidi". Pýtin Stalingrad shaiqasyndaǵy jeńiske 80 jyl tolýyna orai ótken kezdesý kezinde osylai dep málimdedi. Bul týraly Azattyq radiosy habarlady.
Onyń sózinshe, Resei "Batys elderiniń agressiiasyna toitarys berýge" májbúr. Sonymen birge Pýtin "Reseidiń qaýipsizdigine qater tóndirgen" áldebir "natsizm" ideologiiasy týraly aitty. Onyń aitýynsha, qazir "Reseimen soǵystyń sipaty bólek" bolady.
"Tańdanarlyq jait, biraq fakt: bizge taǵy da bortynda krest tańbalary bar nemistiń "Leopard" tankilerimen ses kórsetip jatyr. Ýkraina jerinde banderashyldardyń qolymen Reseige qarsy soǵysqysy keledi" - dedi Pýtin.
Buǵan deiin Reseidiń joǵary laýazymdy tulǵalary, arasynda Pýtin de bar, Ýkrainaǵa basyp kirgen kezde "arnaiy operatsiianyń" basty maqsaty "denatsifikatsiia" dep málimdegen edi. "Bul termin sol kúii bulyńǵyr bolyp qaldy" deidi sarapshylar.
Kreml Ýkrainaǵa kómektesip jatqan Batys elderiniń áreketinen Ekinshi dúniejúzilik soǵystaǵy oqiǵalarǵa uqsastyq tapqysy keledi. Al Batys elderi qazir Reseidiń ózi Ýkraina aýmaǵyna basqynshylyq jasaǵanyn aityp, mundai "parallel" orynsyz ekenin aitady.
Qańtar aiynda AQSh Ýkrainaǵa "Abrams" seriialy tankilerdiń 31 danasyn berýge ázir ekenin málimdegen. Germaniia 14 "Leopard" tankisin beretinin jáne ózge elderdiń de "Leopardty" Ýkrainaǵa berýine ruqsat etetinin málimdedi. Osylaisha Kievke keminde nemistiń 112 tankisi barady. Atalǵan tehnika Ýkrainaǵa aldaǵy eki-úsh aida jetkizilmek. Kiev pen Berlin tankiler Reseidiń halyqaralyq qaýymdastyq moiyndaǵan aýmaǵynda paidalanylmaitynyn aitqan. Tehnika Ýkraina jerin azat etý úshin ǵana qoldanylady.
Reseidiń Germaniiadaǵy elshisi Sergei Nechaev Berlinniń tank berý týraly sheshimin "óte qaýipti" dep ataǵan. Onyń pikirinshe, mundai sheshim soǵysty jańa deńgeige shyǵarady, "bul nemis saiasatkerleriniń Germaniiany soǵysqa aralastyrmaý týraly málimdemesine de qaishy".
Kremldegiler "Batys bergen tankiler ýkrain áskerine kóp kómektese almaidy" dep málimdegen.
