Búgingi kelissózder barysynda ekijaqty ózara qatynastardy tereńdetý perspektivalary qaraldy. Bul týraly Qazaqstan basshysy Qasym-Jomart Toqaevpen kelissózderden keiingi birlesken málimdemede RF Prezidenti Vladimir Pýtin aitty, dep habarlaidy QazAqparat.
Pýtin Qazaqstan-Resei yntymaqtastyǵy aldaǵy ýaqytta da keńeie túsetinin, ol úshin barlyq obektivti jaǵdai bar ekenin aitty.
«Qazirgi bailanystar jáne ekijaqty ózara is-qimyldy ary qarai tereńdetý perspektivalary búgingi kelissózder barysynda qaralǵan basty taqyryp boldy», - dedi RF basshysy.
Sonymen qatar ol búgingi kelissizder kezinde Qazaqstan Prezidentin basty qonaqtardyń biri retinde maýsym aiynda ótetin Peterbor halyqaralyq ekonomikalyq forýmyna qatysýǵa shaqyrǵanyn jetkizdi.
«Qazaqstan basshysy bizdiń shaqyrtýdy qabyl aldy dep úmittenemiz, sondai-aq Sankt-Peterbordaǵy forýmǵa Qazaqstannyń saiasatkerlerinen, biznesmenderinen jáne qoǵam qairatkerlerinen quralǵan aýqymdy delegatsiiany kútemiz», - dedi Vladimir Pýtin.
