Resei basshysy Vladimir Pýtin 19 shildede, iaǵni Ýkrainada soǵys bastalǵaly beri alǵash ret alys elge saparlady. Ol Iranǵa baryp, prezident Ibrahim Raisi, eldiń rýhani kósemi Áli Hamenei jáne Túrkiia basshysy Rejep Erdoǵanmen kezdesti, dep habarlaidy Azattyq.
Pýtinniń sapary Siriiadaǵy jaǵdaidy retteýge baǵyttalǵan Astana kelissózi aiasynda ótken. Resei men Iran Siriiadaǵy avtoritar prezident Bashar Asad jetekshilik etetin ortalyq bilikti qoldaidy. Al Túrkiia eldiń soltústigindegi qarýly oppozitsiiaǵa dem beredi. Alaida kelissózde Ýkrainadaǵy soǵys máselesi de talqylandy.
Túrkiia NATO-ǵa múshe bolǵanmen, Reseige qarsy sanktsiiany qoldamaidy. Biraq Ýkrainaǵa qarý-jaraq ta bergen. Ankara Máskeý men Kiev arasyndaǵy kelissózde araaǵaiyndyq jasaýdy usynǵan. Taraptar atap aitqanda, soǵysqa bailanysty jabylǵan ýkrainalyq porttardan astyqty áketý máselesin talqylaidy.
Tegerannyń resmi tulǵalary - Reseidiń soǵystaǵy pozitsiiasyn ashyq qoldaǵan sanaýly elderdiń biri. Batys elderi Iran Máskeýge áskeri drondar jiberip, tehnikalyq turǵyda qoldaýy múmkin dep qaýiptenedi. Tegeran muny joqqa shyǵarǵanmen, Pýtinmen kezdesýden soń Hamenei eger Resei Ýkrainada soǵys bastamasa, onda NATO-nyń ózi soǵysty bastar edi dep Kremldiń "tanymal tezisteriniń birin" qaitalady.
Pýtinniń sapary qarsańynda reseilik "Gazprom" men irannyń NIOS ulttyq munai-gaz kompaniiasy quny 40 mlrd dollar bolatyn investitsiialyq jobaǵa qatysty ózara túsinisý jaily memorandýmǵa qol qoidy.
Resei siiaqty Iran ekonomikasy da Batystyń qatań sanktsiiasyna ushyraǵan. Resei ekonomikasy oqshaýlanyp jatqan tusta eki el basshylary áriptestikti nyǵaitýǵa kelisti.
Kelissózden keiin taraptar terrorizmmen birigip kúresetinin aitqanmen naqty kelisim týraly aitpady. Al Pýtin men Erdoǵan astyq boiynsha kelissózde ilgerileýshilik bolǵanyn habarlady.
