Resei prezidenti Vladimir Pýtin Belarýske "qajet kezde kómektesý úshin" kúshtik qurylym ókilderinen rezerv jasaqtaǵanyn habarlady. Bul týraly RIA Novosti agenttigi habarlady. Pýtin ázirge Belarýste resei kúshterin qoldanýǵa qajettilik týyndaǵan joq dedi. Minsk de munymen kelisedi dedi ol.
Onyń aitýynsha, Belarýste ekstremistik elementter "shekten shyǵyp, qaraqshylyqqa barmasa" Resei kúshteri qoldanylmaidy. "Belarýste barlyq máseleler beibit jolmen sheshilýi tiis" dedi Pýtin.
"Belarýs aldynda mindettemelerimiz bar. Lýkashenko da osy máseleni qozǵady: ol kerek kezde qajetti kómek kórsetkenimizdi qalaidy. Men Resei barlyq mindettemelerdi oryndaidy dep aittym. Aleksandr Grigorevich quqyq qorǵaý organ qyzmetkerlerinen quralǵan belgili bir rezerv jasaqtaýdy surady, men ótinishin oryndadym. Biz ony jaǵdai baqylaýdan shyqqan jaǵdaida ǵana qoldanamyz dep kelistik. Saiasi urandardy jeleý etken ekstremistik elementter shekten shyǵyp, qaraqshylyq jasasa, kólikter men úiler, bankterdi órtep, ákimshilik ǵimarattardy búldirse ǵana [rezerv kómegine júginemiz]" dedi Pýtin.
17 tamyzda Reseidegi E95 jáne M1 trassasynda qandai da bir aiqyndaǵysh belgileri joq nómirlenbegen Rosgvardiia mashinalaryna uqsaityn ondaǵan "Ýral" men KamAZ kóligi Belarýspen shekaraǵa qarai jyljyǵan. Bul týraly birneshe aqparat quraldaryndaǵy sýretter men videolardy saraptaǵan Conflict Intelligence Team (CIT) zertteý toby jazǵan.
