Resei prezidenti Vladimir Pýtin 15 qazanda Aýǵanstannyń soltústigine DAISh (Qazaqstanda tyiym salynǵan, ózderin "Islam memleketi" dep ataityn ekstremistik toptyń arab tilindegi ataýynyń qysqartylǵan nusqasy – red.) tobynyń eki myń sodyry jinalǵanyn aitty. Kelesi aptada Máskeýde Aýǵanstandaǵy jaǵdaiǵa bailanysty halyqaralyq kelissóz óteiin dep jatqan shaqta Pýtin osyndai málimdeme jasap otyr, dep habarlady Azattyq.
"Resei barlaý qyzmetiniń málimetine sáikes, Aýǵanstannyń soltústiginde DAISh músheleriniń sany shamamen 2 myńǵa jetedi" dedi Pýtin juma kúni TMD elderiniń sammitine baǵyttalǵan videomálimdemesinde.
Resei basshysynyń sózine qaraǵanda, DAISh jasaǵy bosqyn keipine enip, Ortalyq Aziia elderinde dini jáne etnikalyq alaýyzdyqty qozdyrýǵa tyrysady.
Osy aptada sál erterek Pýtin DAISh-qa qatysy bar Irak pen Siriiadaǵy sodyrlardyń Aýǵanstanǵa jinalǵanyn aitqan, al Resei syrtqy ister ministri "Talibandy" (Qazaqstanda tyiym salynǵan uiym) qaterge tótep berýge shaqyrǵan.
Reseidiń Aýǵanstandaǵy arnaiy ókili Zamir Kabýlovtyń aitýynsha, kelesi aptada ótetin kelissózde taraptar Aýǵanstandaǵy jaǵdaidy ózgertý boiynsha ortaq ustanym qalyptastyrýǵa kúsh salady. AQSh, Qytai men Pákistan da 19 qazanda ótetin jiynǵa qatysady. Kabýlovtyń aitýynsha, "Taliban" jáne aimaqtaǵy ózge de toptar jiynǵa bir kúnnen keiin qosylady.
