Resei prezidenti Vladimir Pýtin Armeniia men Ázerbaijannyń SIM basshylaryn Máskeýge Taýly Qarabaq qaqtyǵysy kezinde qaza tapqandardyń máiitteri men tutqyndardy almasý máseleleri boiynsha keńesýge shaqyrdy. Bul týraly beisenbi kúni Kremldiń baspasóz qyzmeti málim etti, dep habarlaidy TASS agenttigi.
«Ázerbaijan Respýblikasynyń prezidenti Ilham Álievpen jáne Armeniia Respýblikasynyń premer-ministri Nikol Pashinianmen telefon arqyly sóileskennen keiin Resei Federatsiiasynyń prezidenti qaitys bolǵandardyń máiitteri men tutqyndardy almasý úshin gýmanitarlyq sebepter boiynsha Taýly Qarabaq qaqtyǵys aimaǵynda júrgizilip jatqan áskeri qimyldardy toqtatýǵa shaqyrady. Resei Syrtqy ister ministriniń bitistirilýshiligimen konsýltatsiialar ótkizý úshin Ázerbaijan men Armeniianyń syrtqy ister ministrleri 9 qazanda Máskeýge shaqyrylady», - delingen habarlamada.
Eýropa qaýipsizdik jáne yntymaqtastyq uiymy (EQYU) aiasynda qol qoiylǵan Taýly Qarabaq boiynsha Minsk kelisiminiń ókilderi sanalatyn AQSh, Frantsiia jáne Resei 8 qazanda Jenevada qaqtyǵysty retteý máselesin talqylai bastaǵan. Oǵan Ázerbaijan syrtqy ister ministri Jeihýn Bairamov ta qatysqan.
Beisenbi kúni Ázerbaijan syrtqy ister ministri atys toqtamaidy dep málimdegen. Ázerbaijan basshysy Ilham Áliev Armeniia Taýly Qarabaqtan áskerin qashan shyǵaratynyn aitýy tiis, tek sol kezde ǵana kelissóz týraly aitýǵa bolady degen.
Taýly Qarabaqta jaǵdai 27 qyrkúiekte ýshyqqan. Erevan men Baký bir-birin jaǵdaidy ýshyqtyrdy dep kinálaidy. Eki jaqtan da adam shyǵyny bar. Qaqtyǵys kezinde beibit turǵyndar da qaza bolǵan.
Aita keteiik, Qarabaqtaǵy qaqtyǵys 1988 jyly aqpanda, Taýly Qarabaq avtonomiialyq oblysy Ázerbaijan Keńester odaǵy quramynan shyǵatynyn jariialaǵan kezde bastaldy.
1992-1994 jyldardaǵy qarýly qaqtyǵystardyń saldarynan Ázerbaijan Taýly Qarabaq pen oǵan irgeles jatqan jeti aýdandy baqylaýdan shyǵaryp aldy.
