Almatynyń Almaly aýdandyq sotynda prokýrorlar "terrorizmdi nasihattaý" (Qylmystyq kodekstiń 256-baby) jáne "ulttyq jáne dini alaýyzdyq týdyrý" (174-bap) baptary boiynsha aiyptalǵandardy uzaq jylǵa sottaýdy surady, dep habarlaidy Azattyq.
Prokýror Maqsat Dáýirbaev aiyptalǵan toǵyz adamnyń tórteýine (eki bap boiynsha aiyp taǵylǵan) - 40 jastaǵy Juldyzbek Táýirbekov, 40 jastaǵy Bolatbek Nurǵaliev, 36 jastaǵy Beket Myńbasov jáne 39 jastaǵy Ernar Samatovqa toǵyz jyl túrme jazasyn berýdi surady.
Al "ulttyq jáne dini alaýyzdyq týdyrdy" dep aiyptalǵan qalǵan bes adam - 27 jasar Azamat Úmbetaliev, 34 jastaǵy Jasulan Ysqaqov, 32 jastaǵy Samat Ádilov, 31 jastaǵy Nazym Ábdirahmanov pen 36 jastaǵy Esim Sýleimenovterge jeti jarym jyl bas bostandyǵynan aiyrý jazasyn surady.
Prokýror Dáýirbaevtyń sózinshe, barlyq aiyptalýshynyń kinási kýágerler kýáligimen, is materialdary jáne sarapshylar qorytyndysymen deláldengen. Al protsess kezindegi aiyptalýshylardyń tergeý kezinde bergen jaýaptarynan bas tartýyn prokýror "jaýapkershilikten qashý" dep baǵalady.
Prokýrordyń sózinshe, Bolatbek Nurǵaliev "terrorizm men salafizm ideiasyn nasihattaý maqsatynda" top qurǵan jáne osy aǵym ókilderin kóbeitý úshin taǵy segiz adamdy topqa qosqan. Aiyptaý tarabynyń pikirinshe, bul azamattar "áreketteriniń qaishy ekenin bilse de, ortaq maqsat qoiyp, áreket etken, dini taqyryptardy qyzý talqylaǵan, qasaqana terrorizmdi nasihattap, dini alaýyzdyq týdyratyn radikaldy jazbalar qaldyrǵan".
30 shildedegi prokýrorlar sózinen keiin eki bap boiynsha aiyptalǵan úsh adam men qorǵaýshylary sóz aldy. WhatsApp tobynyń moderatory bolǵan Bolatbek Nurǵaliev terrorizmnen aýlaq ustaityn oilardy nasihattaǵanyn, biraq tergeý oryndarynyń sózin konteksten julyp alyp, durys interpretatsiia jasamaǵanyn aitty. Ol óziniń esh kinási joq ekenin aityp, sottan aqtaýdy surady. Odan keiin sóilegen Myńbasov pen Samatov ta ózderiniń qylmys jasamaǵanyn aityp, ózderin aqtaýdy surady.
Sot otyrysynyń endigi bóliginde qalǵan aiyptalýshylar men olardyń qorǵaýshylary sóileidi.
Toǵyz er adamnyń ústinen qozǵalǵan is boiynsha sot biyl naýryz aiynda bastalǵan. Tergeý jáne aiyptaý organdary Qazaqstannyń ár aimaǵynda turatyn toǵyz er adam chatta "qasaqana radikaldy pikirler jazdy" dep sanaidy. Sotqa shaqyrylǵan sarapshy WhatsApp-taǵy mátinnen alaýyzdyq pen terroristik ideialardy nasihattaý belgilerin tappady.
