Almaty prokýratýrasynda jedel járdem júrgizýshisin urǵan Túrkiia azamaty Áli Demir nege kepildememen bosatylǵanyna túsinikteme berdi, dep habarlaidy QazAqparat tilshisi.
Baqylaý organy Túrkiianyń azamaty Áli Demirdiń buzaqylyq áreketine bailanysty QR QK 293-babynyń 1-bóligimen sotqa deiingi tergeý jumystary qolǵa alyndy.
«Qoǵamnyń qyzý talqylaýyna túsken soń Demir E.A Almatydaǵy qalalyq IID ýaqytsha oqshaýlaý ornyna qamaldy. 20 qyrkúiekte Almaly aýdandyq prokýratýrasyna tergeýshiniń quqyq buzýshyny qamaýǵa alý týraly aryzy túsken. Qylmystyq kodeks boiynsha tek 5 jyldan asa túrmege qamalý jazasy qarastyrylǵan qylmystar boiynsha ǵana qamaýǵa alý bultartpaý sharasy qabyldanady», - delingen habarlamada.
Áli Demir asa aýyr emes qylmys jasady degen kúdik bar. Bul qylmysy úshin oǵan ary ketkende 2 jylǵa bas bostandyǵynan aiyrý jazasy bolýy múmkin.
«Ol Túrkiia azamaty ekenine qaramastan ol Qazaqstan azamatshasyna úilengen. Balasy bar. Turaqty tirkelgen mekenjaiy boiynsha turady. Qylmystyq tergeý oryndarynda onyń buǵan deiin qylmys jasamaǵany anyqtalǵan. Prokýratýra kúdiktiniń tergeý isine kedergi keltiretinine shúbá keltirip otyr», - dedi prokýratýranyń baspasóz qyzmetinen.
Qazir Áli Demir kepilmen bosatyldy.
Al qalalyq IID tergeý basqarmasy Almaly aýdandyq prokýratýrasynyń kepilmen bosatý týraly sheshimine qarsy shyqqan bolatyn.
Eske sala ketsek, Almatyda jolǵa talasqan azamat jedel járdem júrgizýshisin soqqyǵa jyqty. Sol kúni Almaty politsiiasy 1990 jyly týǵan Túrkiia azamatyn, iaǵni Folksvagen Passat kóliginiń júrgizýshisin ustady.
13 jyldan beri jedel járdemde jumys isteitin Nikolai Kýchma ashýshań júrgizýshini jazasyz qaldyrmaýǵa bekinip otyr.
