Premer-ministrdiń orynbasary Eraly Toǵjanov Májilis depýtattarynyń saýalyna bergen jaýabynda professorlyq oqytýshylar quramynyń eń tómengi jalaqysy qandai mólsherde bekitilgenin aitty, dep habarlaidy QazAqparat.
«Qazirgi kezde joǵary jáne joǵary oqý ornynan keiingi bilim berý uiymdaryna (JJOKBU) direktorlar keńesiniń sheshimimen paidany zerthanalyq bazany jaraqtandyrýǵa, JJOKBU-nyń infraqurylymyn damytýǵa, sondai-aq professorlyq-oqytýshylyq qurmanyń (OPQ) jalaqysyn arttyrý máselesin qaraýǵa bólý quqyǵy berilgen. Osylaisha, OPQ-nyń jalaqysyn arttyrý máselesi JJOKBU-nyń quzyretine kiredi. OPQ jalaqysyna qatysty júrgizilgen saraptamalyq saýalnama JJOKBU oqytýshylarynyń kópshiliginiń pikiri oqytýshylar quramynyń barlyq sanattary úshin eń tómengi jalaqyny belgileý qajettigin kórsetti», - dep jazylǵan Eraly Toǵjanovtyń jaýabynda.
Onyń aitýynsha, Bilim jáne ǵylym ministrligi joǵary jáne joǵary oqý ornynan keiingi bilim berý uiymdarymen birlesip, OPQ jalaqysyn odan ári arttyrý úshin esepteýler júrgizgen.
«QR Bilim jáne ǵylym ministrliginiń joǵary jáne joǵary oqý ornynan keiingi bilim berý uiymdaryndaǵy professorlyq oqytýshylar quramynyń usynylatyn pedagogikalyq júktemesin jáne eń tómengi jalaqysyn aiqyndaý týraly» № 122 buiryǵymen 680 akademiialyq saǵat júktemesi kezinde shtattyq oqytýshylarǵa usynylatyn júkteme men eń tómengi jalaqy belgilendi», - deidi vitse-premer.
Naqtyraq aitsaq, bul mólsher qatardaǵy oqytýshy úshin – 200 000 teńge, aǵa oqytýshy úshin – 230 000 teńge, qaýymdastyrylǵan professor úshin – 260 000 teńge, professor úshin – 350 000 teńge, Ulttyq JJOKBU-da professor úshin – 400 000 teńge.
«Professorlyq oqytýshylar quramynyń pikiri boiynsha, kórsetilgen eń tómengi jalaqy somasy jas oqytýshylardy joǵary bilim berý júiesine tartý, oqytýshylardy ǵylymi-zertteý qyzmetine yntalandyrý jáne jalpy OPQ-nyń sapalyq quramyn qalyptastyrý úshin jetkilikti bolyp tabylady. Sonymen qatar Qazaqstan Respýblikasynda bilim berýdi jáne ǵylymdy damytýdyń 2020-2025 jyldarǵa arnalǵan memlekettik baǵdarlamasynda memlekettik tapsyrys qunyn 2020 jylǵy 1 qyrkúiekten bastap ulǵaitý kózdelgen», – deidi Eraly Toǵjanov.
