QR Prezidenti Qasym-Jomart Toqaevtyń baspasóz hatshysy Berik Ýáli Memleket basshysy sýretiniń onlain-kazinolardyń jarnamasyna qoldanylýyna qatysty resmi málimdeme jasady, dep habarlaidy "Ult aqparat".
«Maǵan buqaralyq aqparat quraldarynan áleýmettik jelilerde paida bolǵan Prezident Qasym-Jomart Toqaevtyń sýreti beinelengen onlain-kazinolardyń jarnamasyna qatysty júginip jatyr. Memleket basshysynyń atalǵan jarnamaǵa eshqandai qatysy joqtyǵyn, al onyń sýreti zańsyz paidalanǵanyn resmi málimdeimin. Bul - josyqsyz feik jarnama. Bizdiń paiymyzsha, mundai jariialanymdar áleýmettik jeli paidalanýshylaryn jańylysýǵa ákelip, bedeline aitarlyqtai zalal keltiredi», - dep jazdy Berik Ýáli Facebook-tegi paraqshasynda.
Osy rette ol bul máselemen quqyq qorǵaý organdary ainalysyp, jarnama berýshilerdi anyqtaý arqyly olardy jaýapkershilikke tartý máselesin sheshetindigine úmit artatyndyǵyn atap ótedi.
«Barlyq áleýmettik jelilerdi kommertsiialyq jariialanymdardy ornalastyrýǵa barynsha jaýapkershilikpen qarap, bireýlerdiń sýretin jáne ózge de beinelerdi zańsyz paidalanýǵa jol bermeýge shaqyramyn», - dedi Memleket basshysynyń baspasóz hatshysy.
