Qazaqstan Prezidenti Qasym-Jomart Toqaevtyń Qytaiǵa sapary óte joǵary deńgeide ótti. Bul týraly búgin Ortalyq kommýnikatsiialar qyzmetindegi brifingte QR Prezidentiniń baspasóz hatshysy Berik Ýáli aitty, dep habarlaidy QazAqparat.
«Memleket basshysy Qasym-Jomart Toqaev myrza Qytai Halyq Respýblikasyna ekikúndik memlekettik saparmen baryp qaitty. Sapar óte nátijeli, joǵary deńgeide ótti dep aitýǵa tolyq negiz bar. Onyń nátijesinde Qazaqstan men Qytai Kóshbasshylary birlesken málimdeme jasap, 10 mańyzdy qujatqa qol qoiyldy. Jalpy, QHR Tóraǵasy Si Tszinpin myrza men Qasym-Jomart Toqaevtyń arasynda óte joǵary deńgeidegi kelissóz ótti. Munan bólek Prezident kórshi eldiń birqatar memleket qairatkerimen, isker top ókilderimen júzdesti. Qytai qoǵamdyq ǵylymdar akademiiasynyń ustazdarymen, stýdentterimen kezdesip, olardyń aldynda dáris oqydy. Sonymen qatar sol jaqta oqyp júrgen stýdentterimizben de kezdesti», - dedi Berik Ýáli.
Onyń atap ótýinshe, Memleket basshysy Hanchjoý qalasynda Qytaidyń álemdik naryqqa innovatsiialyq ónimderin shyǵaratyn Hikvision kompaniiasynyń jáne jahandyq internet saýda salasynyń kóshbasshysy sanalatyn Alibaba Group kompaniiasynyń shtab-páterinde bolǵan. Kompaniianyń negizgin qalaǵan Djek Mamen kezdesken. Qazaqstan Prezidenti Djek Maǵa Qazaqtyń uly aqyny Abaidyń 175 jyldyǵyna orai álemdik chellendjge ún qosqany úshin rizashylyǵyn bildirgen.
«Jalpy, kórshiles elderdiń yntymaqtastyǵyn arttyratyn keleli kelisimder jasalǵan, uzaq merzimdi strategiialyq qarym-qatynasty nyǵaita túsken jemisti sapar boldy dep nyq senimmen aita alamyz. Ózderińiz bilesizder, Qazaqstan territoriialyq turǵydan álemdegi eki alyp memleketpen qurlyqtaǵy shekarasy bar. Onyń biri Resei bolsa, shyǵysymyzda - Qytai memleketi. Qazirgi tańda elimizdiń 1782 shaqyrym shekarasy osy Qytaimen shektesedi. Bul úlken qurlyqtyq shekara bolyp esepteledi. Kórshiles, irgeles turǵan elmen aralaspai, alys-beris jasamai tura almaimyz. Óitkeni, Qytai bizdiń Qudai qosqan kórshimiz. Sol sebepti Qytaimen bailanysymyzdy ornyqtyrýymyz, máńgilik strategiialyq áriptestik ornatýymyz zańdylyq», - dedi Prezidenttiń baspasóz hatshysy.
