Qazaqstan Respýblikasy Prezidentiniń Baspasóz qyzmeti Memleket basshysynyń 2022 jylǵy BAQ salasyndaǵy syilyqtary men granttaryn, sondai-aq Alǵysyn alýǵa úmitkerlerden usynymdar qabyldaý bastalǵanyn habarlady.
Syilyqtar men granttar alýǵa úmitkerlerdi, sondai-aq Alǵys jariialaýǵa shyǵarmashylyq ujymdardy BAQ, shyǵarmashylyq odaqtar, qoǵamdyq birlestikter, memlekettik organdar usyna alady.
Árbir BAQ, shyǵarmashylyq odaq, qoǵamdyq birlestik, memlekettik organ syilyqtar men granttar alýǵa eki úmitker ǵana usynýǵa quqyly. Granttar jasy otyz besten aspaǵan jas jýrnalisterge beriledi.
Grant iegeri atanǵan tulǵa syilyq alý úshin keminde bes jyldan keiin usynylady.
Syilyqtar men granttar alýǵa úmitkerlerdiń jáne Alǵys jariialaýǵa shyǵarmashylyq ujymdardyń ózin-ózi usynýyna jol berilmeidi.
Syilyqtar nemese granttar alýǵa buqaralyq aqparat quralynyń, shyǵarmashylyq odaqtyń, qoǵamdyq birlestiktiń, memlekettik organnyń resmi blankisine jazylǵan, birinshi basshy nemese onyń ornyndaǵy adam qol qoiǵan (A4 formattaǵy kólemi 2 paraqtan aspaityn) usynym joldanady. Oǵan mynadai qujattar qosa usynylady:
- syilyqtar nemese granttar alýǵa usynylǵan úmitkerdiń aty, ákesiniń aty, tegi jáne shyǵarmashylyq búrkenshik esimi (eger bolsa), sondai-aq atqaratyn laýazymy kórsetilgen negizgi jumys ornynan anyqtama;
- syilyqtar nemese granttar alýǵa usynylǵan úmitkerdiń jeke kýáliginiń nemese tólqujatynyń kóshirmesi;
- syilyqtar nemese granttar alýǵa usynylǵan úmitkerdiń shyǵarmashylyq qyzmetiniń qysqasha sipattamasy;
- negizgi jariialanymdarynyń tizimi jáne olardyń kóshirmeleri, aýdio jáne (nemese) beinematerialdar nemese sondai materialdardyń internet-siltemeleriniń tizimi.
Alǵys jariialaýǵa shyǵarmashylyq odaqtyń, qoǵamdyq birlestiktiń, memlekettik organnyń resmi blankisine jazylǵan birinshi basshy nemese onyń ornyndaǵy adam qol qoiǵan buqaralyq aqparat quralynyń qyzmeti týraly (A4 formattaǵy kólemi 2 paraqtan aspaityn) usynym usynylady.
Konkýrsqa mán-mańyzy joǵary negizgi jariialanymdar, aýdio jáne (nemese) beinematerialdar nemese sondai materialdardyń internet-siltemeleriniń tizimi usynylady.
Qaraýǵa 2021 jylǵy 1 maýsym men 2022 jylǵy 31 mamyr aralyǵynda jariialanǵan jáne (nemese) efirge shyqqan materialdar qabyldanady.
Syilyqtar, granttar alýǵa jáne Alǵys jariialaýǵa usynylǵan materialdar men qujattar qaitarylmaidy.
Kitaptar BAQ salasyndaǵy nagradalar alýǵa usynylǵan material retinde qarastyrylmaidy. Merzimdi basylymdarda jaryq kórgen maqalalar toptamasyn usynýǵa bolady.
Memleket basshysynyń syilyqtaryn, granttaryn alýǵa jáne Alǵysyn jariialaýǵa usynymdardy Qoǵamdyq komissiianyń tóraǵasy – Qazaqstan Respýblikasy Prezidentiniń Ákimshiligi Basshysynyń orynbasary A.Ǵ. Balaevanyń atyna 2022 jylǵy 31 mamyrǵa deiin myna meken-jai boiynsha: 010000, Nur-Sultan q., «Aqorda» rezidentsiiasyna joldaý qajet.
Qaǵaz túrinde joldanatyn qujattar poshta qyzmeti arqyly joǵaryda kórsetilgen meken-jaiǵa jiberiledi nemese «Úkimet úii» ǵimaratynda (Nur-Sultan q., Máńgilik el dańǵyly, 6) ornalasqan Prezident Ákimshiligi Jalpy bóliminiń hat-habardy qabyldaý sektory arqyly jumys kúnderi saǵ. 09:00-15:30 aralyǵynda (túski úzilis saǵ. 13:00-14:30), senbi kúni saǵ. 10:00-11:00 aralyǵynda qabyldanady.
Memlekettik organdardyń usynymdary elektrondyq qujat ainalymynyń biryńǵai júiesi arqyly tek elektrondyq formatta ǵana qabyldanady, bul qosymshalary elektrondyq tasymaldaǵysh (disk) arqyly joldanatyn usynymdarǵa qatysty emes.
Bailanys nómirleri: +7 (7172) 74-40-81, 74-40-51.
