QR Eńbek jəne halyqty əleýmettik qorǵaý ministri Berdibek Saparbaev Astana ataýynyń Nursultan dep ózgerýine qatysty oiyn aitty, dep habarlaidy Baq.kz agenttigi.
"Sheshim qabyldandy. Men durys dep oilaimyn. Eńbegi bar. Astanany astana jasaǵan, dúniejúzine tanytqan - Nursultan Nazarbaev. Sizder bilesizder, Astanada ómiri bolmaǵan sammitter ótip, ómiri kezdespeitin memlekettiń basshylary kezdesedi, bir-birimen tatýlasady. Eń negizgisi, osy Astana arqyly Qazaqstan, onyń ishinde qazaq halqy búkil dúniejúzine málim boldy. Qazir Astana - əlemdegi ədemi, sulý qalalardyń biri. Qiyn kezde, 90-shy jyldardyń basynda osyndai sheshim qabyldap, ózine jaýapkershilik alý ərkimniń qolynan kele bermeidi. Ol úshin úlken júrek, tabandylyq əri "erteń oryndalady" degen senimdilik kerek. Mine - sonyń dáleli, qazir 20 jyldan asty, Astanamyzdyń qalai bolǵanyn kórip otyrmyz. Bul durys sheshim, óitkeni ol tarih, bolashaq úshin kerek", - dep jaýap berdi Saparbaev.
Ministrdiń aitýynsha, jastardy solai tərbieleý qajet. Ərbir jas óz Otanyn, ultyn, memleketin súiip ósý kerek jəne sol elge eńbek etken adamdardy da esh ýaqytta umytpaý kerek.
"Biz "tarihsyz bolashaq bolmaidy" dep aitamyz ǵoi. Sondyqtan meniń oiymsha, bul - durys sheshim", - dedi ol.
Eńbek ministri el basshylyǵynyń aýysýyna qatysty da oiyn aitty.
"Bizdiń Tuńǵysh prezident Nursultan Nazarbaev tarihi sheshim qabyldady. Bilik Qasym-Jomart Toqaevqa ótti. Qasym-Jomart Kemelulyn barlyq qazaqstandyqtar jaqsy biledi. Ol Qazaqstanda ǵana emes, halyqaralyq arenada da tanymal. Biz Nursultan Nazarbaevtyń arqasynda bastalǵan jəne júzege asqan strategiia, baǵdarlama odan əri jalǵasady dep úmittenemiz. Keshe Toqaevtyń ózi de solai aitty. Bastysy, bizde beibitshilik pen tynyshtyq bolsyn. Elimizdiń basty baǵyty belgili. Tek qana barlyǵymyzǵa jumylyp, jumys isteý kerek", - dedi Berdibek Saparbaev.
Sondai-aq Ministr qazaqstandyqtardy Naýryz merekesimen de quttyqtady.
"Barlyǵyna densaýlyq, amanshylyq, úilerine qut-bereke, elimizge tynyshtyq tileimin. Naýryz qutty bolsyn", - dedi Saparbaev EKSPO alańyndaǵy Naýryz merekesine arnalǵan is-sharada.
Atap ótsek, keshe Memlekettiń jańa basshysy Qasym-Jomart Toqaev Parlamenttiń birlesken otyrysynda Astana ataýyn Nursultan dep ózgertýdi usyndy. Parlament bul sheshimdi maquldady. Naqty resmi sheshim jaqyn arada shyǵyp, jariia etiledi.
