Búgin QR Ortalyq sailaý komissiiasynyń otyrysy ótip, onda «Prezidenttikke kandidatty qoldap qol jinaýdy jáne olardyń rastyǵyn tekserýdi uiymdastyrý týraly» qaýly qabyldandy, dep habarlaidy QazAqparat tilshisi.
Qaýly jobasyn tanystyrǵan QR Ortalyq sailaý komissiiasynyń múshesi Aqylbek Ihdanov aitýynsha, «Sailaý týraly» Konstitýtsiialyq zańnyń 56-baby 1-tarmaǵyna sáikes sailaýshylardyń Prezidenttikke kandidatty qoldaýy olardyń qol jinaýy arqyly rastalady. Osy zańnyń 56-baby 3-tarmaǵyna sáikes Prezidenttike kandidatty qoldap qol jinaýdy senim bildirilgen adamdar uiymdastyrady jáne kandidattyń Konstitýtsiiada jáne «Sailaý týraly» Konstitýtsiialyq zańda belgilengen talaptarǵa sáikestigin teksergennen keiin 5 kún merzimnen keshiktirmei Ortalyq sailaý komissiiasy beretin qol qoiý paraqtarymen rásimdeledi.
«2019 jyldyń 1 qańtarynda respýblika sailaýshylarynyń jalpy sany 11 mln 814 myń 19 adamdy quraidy. Jalpy sannyń 1 paiyzy 118 myń 140 adamdy quraidy. Osylaisha, Prezidenttikke kandidat 118 myń 140 sailaýshynyń qoldaýyna ie bolýy tiis», - dedi ol.
Komissiia múshesiniń aitýynsha, árbir qol qoiý paraǵynyń rettik nómiri bolýǵa jáne oǵan kandidattyń tegi, aty jáne ákesiniń aty, onyń senim bildirilgen adamynyń jeke qoly, qol jinaýshy adamnyń tegi, aty jáne ákesiniń aty, qol jinaý júrgiziletin eldi mekenniń ataýy, sondai-aq qol qoiatyn adamdar týraly ómirbaiandyq málimetterdi qamtityn baǵandar engizilýge tiis. Kandidattardyń ózderine sailaý naýqanyn ótkizýge kómektesetin, sailaý aldyndaǵy úgit júrgizetin, kandidattardyń múddelerin bildiretin senim bildirilgen adamdary bolýǵa quqyǵy bar. Kandidattar senim bildirilgen adamdardy óz qalaýy boiynsha tiisti sailaý okrýgindegi árbir sailaý ýchaskesine úsh adamnan aspaityn sanda anyqtaidy. Óz kezeginde, olar tiisti sailaý komissiiasyna senim bildirilgen adamdar bolýǵa óz kelisimi týraly ótinish beredi.
«Sailaý komissiiasy senim bildirilgen adamdardy tirkegennen keiin olarǵa tiisti kýálik beredi. Senim bildirilgen adam Qazaqstan Respýblikasynyń azamaty bolýǵa tiis, qandai da bir sailaý komissiiasynyń múshesi, saiasi memlekettik qyzmetshi laýazymyn atqaratyn tulǵa bola almaidy. Sailaý týraly qoldanystaǵy zańnamaǵa sáikes senim bildirilgen adamdar qol jinaýdy uiymdastyrý maqsatynda tikelei sailaýshylar qolyn jinaityn basqa da adamdardy tarta alady», - dedi A.Ihdanov.
Qol jinaýshy adam qoldardy jinaǵan kezde tiisti qol qoiý paraǵynda jeke qoly turǵan kandidattyń senim bildirilgen adamyn tirkeý týraly kýáliktiń kóshirmesin kórsetýge tiis. Qol jinaityn adam qol qoiý paraǵyna mindetti túrde óziniń jeke qolyn qoiady. Qol jinaýshy adamdarǵa qosymsha zańnamalyq talaptar belgilenbegen. Prezidenttikke kandidatty qoldap qol jinaý jónindegi toltyrylǵan qol qoiý paraqtary aýmaqtyq sailaý komissiiasyna tapsyrylady, ol 10 kúndik merzimde pasport qyzmetteriniń jumyskerlerin tarta otyryp, qoiylǵan qoldardyń durystyǵyn tekserýdi júzege asyrady, Prezidenttikke kandidatty qoldaityn qoldardyń durystyǵyn tekserý nátijeleri týraly tiisti hattamany resimdeidi jáne ony Ortalyq sailaý komissiiasyna jiberedi.
«Prezidenttikke kandidatty qoldap qol jinaýdy jáne olardyń durystyǵyn tekserýdi uiymdastyrý týraly» qaýlymen Ortalyq sailaý komissiiasynyń qol qoiý paraqtaryn berý merzimderi 5 kúnnen 2 kúnge deiin qysqartyldy, al qoiylǵan qoldardyń durystyǵyn tekserý merzimi eki esege 10 kúnnen 5 kúnge deiin qysqardy. Osylaisha, sailaýdy uiymdastyrýshylar ishki rásimderdi ótkizý merzimderin qysqartý esebinen sailaý protsesine qatysýshylardyń is-sharalaryna arnalǵan ýaqytty ulǵaitady.
