QR Prezidenttigine kandidat retinde tirkeýge kedergi keltiretin 107 aýrý tizbesi bekitilgen. Bul týraly búgin QR Ortalyq sailaý komissiiasynyń múshesi Baqyt Meldeshov aitty, dep habarlaidy QazAqparat tilshisi.
«Qazirgi ýaqytta «Qazaqstan Respýblikasynyń Prezidenttigine kandidattyń densaýlyq jaǵdaiy týraly meditsinalyq qorytyndyǵa qoiylatyn talaptardy jáne Qazaqstan Respýblikasynyń Prezidenttigine kandidat retinde tirkeýge kedergi keltiretin aýrýlardyń tizbesin bekitý týraly» Ortalyq sailaý komissiiasy men Densaýlyq saqtaý ministrliginiń birlesken normativtik quqyqtyq aktisi qabyldandy jáne Ádilet ministrliginde 2019 jylǵy 13 sáýirde tirkeldi. Normativtik quqyqtyq aktiler elektrondy túrdegi etalondyq baqylaý bankinde 2019 jylǵy 15 sáýirde tirkelip, jariialanǵan kúnnen bastap zańdy kúshine endi», - dedi ol.
Onyń aitýynsha, meditsinalyq qorytyndy kandidat meditsinalyq kýálandyrý júrgizý úshin júgingen kezden bastap kúntizbelik úsh kúnnen aspaityn merzimde beriledi jáne Qazaqstan Respýblikasy Prezidentiniń sailaýy merzimi ishinde jaramdy bolady. Berilgen meditsinalyq qorytyndylardyń esebin densaýlyq saqtaý uiymdary júrgizedi. Olarǵa densaýlyq saqtaý salasyndaǵy ýákiletti organnyń ǵana qoljetimdiligi bar.
«Birlesken normativtik quqyqtyq aktide Qazaqstan Respýblikasynyń Prezidenttigine kandidat retinde tirkeýge kedergi keltiretin 107 aýrý tizbesi kórsetilgen», - dedi OSK múshesi.
