QR Memlekettik qyzmet isteri agenttigi azamattardan «Prezidenttik Jastar kadrlyq rezervine» irikteýge qatysýǵa ótinimder qabyldaý úshin onlain-platformany iske qosady, dep habarlaidy QazAqparat.
Bul týraly Ortalyq kommýnikatsiialar qyzmetiniń baspasóz otyrysynda agenttik tóraiymy Anar Jaiylǵanova málim etti.
Anar Jaiylǵanova «Prezidenttik Jastar kadrlyq rezervine» úmitkerlerge qoiylatyn negizgi talaptar týraly aityp berdi.
«Qatysýshylar Qazaqstan Respýblikasynyń jasy 35-ten aspaǵan azamaty bolýy kerek. Bilimi men jumys ótili 5 jyldan kem bolmaýy tiis. Kreativti, talantty jastarymyzdyń kóbi shetelde turatynyn jaqsy bilemiz. Sondyqtan, baiqaýǵa sheteldegi Qazaqstan Respýblikasynyń azamattary da qatysa alady», - dedi agenttik basshysy.
Onyń aitýyna qaraǵanda, rezervke ótken kandidattar ulttyq holdingter men ulttyq kompaniialarda saiasi jáne joǵary basqarý ákimshilik laýazymdarǵa, joǵary basshylyq qyzmetterge taǵaiyndalý múmkindigine ie bolamaq.
«Birinshi kezeńde avtomattandyrylǵan júie arqyly qujat qabyldanady. Ekinshi kezeńde úmitkerler testten ótedi. Onda kúrdeli mátindik jáne sandyq aqparatpen jumys isteý qabiletin anyqtaýǵa baǵyttalǵan suraqtar usynylady. Úshinshi kezeńde kandidattar berilgen taqyrypta esse jazyp, áleýmettik mańyzdy jobalaryn tanystyrý qajet. Ol jumystar onlain negizde tekseriledi. Iaǵni, esse jazý protsesinen tikelei kórsetilim usynylady. Tórtinshi kezeńde sarapshylarmen suhbat ótedi. Oǵan aldyńǵy kezeńderde úzdik nátije kórsetken qatysýshylar jiberiledi», - deidi Anar Jaiylǵanova.
Agenttik basshysy atap ótkendei, budan keiin Prezident Ákimshiligi quratyn komissiia irikteýdiń aldyńǵy kezeńderinen tabysty ótken árbir úmitkermen jeke áńgimelesedi. Sonyń qorytyndysy boiynsha Ulttyq komissiia eń joǵary ball jinaǵan kandidattardy Prezidenttik jastar rezervine qabyldaý týraly sheshim qabyldaidy.
«Rezervke alynǵan mamandar naqty laýazymǵa taǵaiyndalǵanǵa deiin arnaiy baǵdarlama boiynsha oqýdan ótedi. Búgingi tańda Prezidenttik jastar kadrlyq rezervine irikteýdiń erejeleri men tártibi Prezident Jarlyǵymen rettelgen», - dedi agenttik basshysy.
