QR Memlekettik qyzmet isteri agenttiginiń tóraǵasy Anar Jaiylǵanova Prezidenttik jastar kadr rezervine ekinshi irikteýdiń negizgi kezeńderi týraly aityp berdi, dep habarlaidy QazAqparat QR Memlekettik qyzmet isteri agenttigine silteme jasap.
Onyń aitýynsha, áleýetti rezervshilerdi irikteý 6 kezeńnen turady.
«Birinshi kezeń – úmitkerlerdiń qujattaryn qabyldaý arnaiy onlain-platformada biylǵy 1-30 qyrkúiek aralyǵynda júrgizildi. Ekinshi kezeń – 2-9 qazan aralyǵynda ótetin eki testileý blogynan quralǵan. Munda úmitkerlerdiń mátindik jáne sandyq aqparatmen jumys isteý qabileti baǵalanady. Úshinshi kezeńde – sitýatsiialyq máseleler sheshiledi. 12-17 qazan aralyǵynda úmitkerlerdiń naqty problemalardy sheshýdegi kózqarasyn baǵalanady. Aldyńǵy irikteýde bul kezeńniń bolmaǵanyn atap ótkim keledi. Iaǵni, qolda bar tájiribeni eskere otyryp, kandidattardyń kásibi qyzmetinde týyndaýy múmkin naqty máselelerdi sheshýge daiyndyǵyn tekserýdi uiǵardyq», - deidi Anar Jaiylǵanova.
Al tórtinshi kezeńde – kásibi HR-menedjerlerdiń qatysýymen úmitkerlerdiń quzyretteri jóninde suhbat ótedi jáne assesment-ortalyq arqyly strategiialyq oilaý, proaktivtilik, qyzmetti basqarý, komandalyq kóshbasshylyq siiaqty jańa formatsiiadaǵy kóshbasshylarǵa tán birqatar minez-qulyq quzyrettiligi baǵalanady.
«Besinshi kezeńde qatysýshylar saraptamalyq komissiiada suhbattasýdan ótedi. Bul kezeńge irikteýdiń aldyńǵy kezeńderinde eń kóp upai jinaǵan qatysýshylar jiberiledi. Prezident Ákimshiligi quratyn komissiia irikteýdiń aldyńǵy kezeńderinen sátti ótken árbir úmitkermen jeke suhbattasady. Suhbat qorytyndysy boiynsha saraptama komissiiasy ashyq daýys berý arqyly rezervke usynylatyn kandidattar tizimin jasaidy jáne ulttyq komissiianyń qaraýyna jiberedi. Al irikteýdiń qorytyndy kezeńinde – qatysýshylardyń kandidatýrasy kadr rezervi jónindegi ulttyq komissiiada qaralady. Bul kezeńge saraptama komissiiasy usynǵan eń joǵary ball jinaǵan qatysýshylar jiberiledi. Komissiia otyrysynyń qorytyndysy boiynsha kandidattardy Prezidenttik rezervke qabyldaý týraly sheshim qabyldanady, ol Prezident Ákimshiligi Basshysynyń buiryǵymen rásimdeledi», - dep túsindirdi agenttik tóraǵasy.
Aita keteiik, Prezidenttik jastar kadr rezervine qatysýshylardy tirkeý aiaqtaldy.
1 qyrkúiekten 1 qazanǵa deiin kadr rezervine qatysýǵa 8 638 adam ótinim berdi. Olardyń arasynda 5133 er adam jáne 3505 áiel bar.
