Prezidenttik jastar kadr rezervine irikteý shyn máninde qalai ótýde. QR Memlekettik qyzmet ister agenttigi irikteýge qatysqan jastardyń pikirin usyndy, dep habarlaidy "Ult aqparat".
«Elimizdegi joǵary basqarýshylyq memlekettik laýazymdarǵa, ulttyq holdingter men kompaniialardaǵy joǵary basqarýshy laýazymdarǵa taǵaiyndalýǵa múmkindik. Osyndai perspektiva elimizdegi jáne sheteldegi myńdaǵan jas qazaqstandyqtardyń qyzyǵýshylyǵyn týdyrdy. Olardyń barlyǵy «Prezidenttik jastar kadr rezervine» irikteýge qatysty», delingen habarlamada.
Prezidenttik rezervke úmitkerlerdiń ishindegi 300 barynsha talantty jáne daiarlanǵan jastar alynady.
Qazirgi ýaqytta testileýdi verifikatsiialaý qorytyndysy boiynsha 549 qatysýshy jobany tanystyrý, esse jazý jáne quzyretterin baǵalaý siiaqty úsh kezeńnen turatyn irikteýdiń kelesi kezeńi - «Áleýetti baǵalaýdan» ótýde. Osy kezeńde úmitkerlerdiń essesi men jobalyq jumysy onlain túrde bir ýaqytta úsh sarapshymen baǵalandy.
Úmitkerlerdiń quzyretterin baǵalaý úshin sertifikattalǵan baǵalaýshylar men kásibi sýpervizorlar tartyldy. Olar úmitkerlerdiń quzyretterin minez-qulyq indiktorlary arqyly, jeke jáne toptyq assesment quraldaryn qoldana otyryp anyqtaidy.
«Áleýetti baǵalaý» kezeńine ótken úmitkerler ózderiniń irikteý jónindegi oilarymen bólisti.
Bekjan, kásipker:
«Basynda 13 myń adamnyń tirkelgenin (Pkrezetv.kz saitynda – esk.) kórgen kezde tań qaldym, óitkeni, bir jarym, eki myń adam bolady dep oiladym...
Kóptegen jastardyń bul jobaǵa qyzyǵýshylyǵy zor ekeni baiqalady. Sonyń ishinen bes júz adamnyń ishine kirip otyrǵanymyz, biz úshin bir mártebe dep oilaimyn...
Óte myqty uiymdastyrylǵan, eshqandai kedergiler bolǵan joq. Basynda «suraqtary qiyn» degen sóz boldy, biraq meniń oiymsha saidyń tasyndai saptalǵan jigitter, qyzdar sondai suraqqa jaýap bere bilý kerek.
Shyndyqty aitqanda, tań qalyp otyrmyz, jeńil bolady degen oimen kelgenbiz. Biraq, búgingi tapsyrmalardy kórip sheteldik kompaniialarǵa jumysqa turyp jatqandai sezimge bólenip otyrmyn».
IT-salasynyń mamany Azamat irikteýden ótpei qalǵan jaǵdaida eshqashan ókinbeitinin aitady.
«Men osyndai jobaǵa qatystym. 550 adamnyń ishine kirgenime óte qýandym (testileýdi verifikatsiialaý qorytyndysy boiynsha 549 qatysýshy kelesi «Áleýetti baǵalaý» kezeńine ótti – esk.)», - deidi ol.
Aleksei, jylý-energetika salasynyń mamany:
«Bul óte ashyq júie. Men neniń qashan iske qosylatynyn, ózimnen neniń talap etiletinin túsinip otyrdym. Ol bir kún ishinde ǵana daiyndalmai, oilastyrylyp jasalǵany baiqalady. Barlyǵy óz kezegimen júretin naqty ashyq júie. Sen óz ornyńdy kórip, aldaǵy ýaqytta ne kútip turǵanyn qarai alasyń. Meniń oiymsha bul aqyldy jastar úshin erekshelenip, ózin joǵary dárejede kórsetý úshin keremet múmkindik…».
Ainara esimdi memlekettik qyzmetshi 24 saǵat boiy qashyqtyqtan testileýdiń yńǵaily bolǵanyn aitady. Onyń aitýynsha, uiymdastyrýshylar BAQ pen áleýmettik jeliler arqyly irikteý boiynsha tolyq aqparat berdi.
Daniel, týrizm salasy:
«Uiymdastyrý maǵan óte qatty unady. Árbir kezeń saiyn men ózime jańa synaq, challenge alyp otyrdym: prezentatsiia jasaý, 5 minýt ishinde 5 slaid kórsetý, belgili ýaqyt ishinde esse tapsyrý. Búgingi assesment, ár rette jyldamdatyp otyrady. Uiymdastyrý jaǵynan barlyq aqparattyń qoljetimdi bolǵanyn atap ótkim keledi…»
Elina, memlekettik qyzmetshi:
«Kadr rezervi jóninde habarlandyrý shyqqannan keiin birden qatysqym kelip ketti. Biraq ainalamdaǵy adamdar kúmánmen qarap, «qyzǵylt kózildirigińdi shesh, ony qaitesiń jáne onda barlyǵy sheshilip qoiǵan shyǵar» dedi. Men talaptanyp kórý kerek dep aittym. Birinshiden, Prezident ózi jariialady. Ekinshiden, bul baq synap kórýge turarlyq jańa format. Úshinshiden, bul - úlken múmkindik. Jalpy jobanyń ózi biregei. Meniń oiymsha munymen barlyq qatysýshylar kelisedi. Onlain jáne oflain kezeńder de bar. Bul árbir úmitkerge arnalǵan keshendi tásil. Ol óte myqty ári jattyqqan uiymdastyrýshylar toby. Barlyǵy óte sapaly jasalǵan. Tehnikalyq qoldaýǵa ótinim bergen kezde shuǵyl arada jaýap beredi. Máseleńdi sheship qana qoimai, qoldaý kórsetýge tyrysady...»
Gúlzira, kásipodaq uiymynyń qyzmetkeri:
«Birinshi kezekte meni saittyń tehnikalyq qamtylýy tań qaldyrdy... Barlyq qajetti jaǵdailar men zattar aldyn-ala qarastyrylǵan. Óz aldymda qandai da bir naqty tehnikalyq qiynshylyqtar týyndaǵan joq. Assesment – ol úmitkerdiń quzyretterin jan-jaqty anyqtaýǵa múmkindik beretin quzyretterdi baǵalaýdyń zamanaýi úrdisi... Búgingi assesment taim-menedjment tarapynan óte jaqsy uiymdastyrylǵan. Biz ózimizdiń kestemizdi, logistikamyzdy, iaǵni qaidan qaida barý kerektigin bilemiz. Qandai strimge jatatynymyzdy bilemiz. Bul túster, aýditoriialar, adamdar sany boiynsha retteý... Men bizdiń memlekettik organnyń qysqa merzimde osyndai aýqymdy jobany júzege asyra alatynyn maqtan tutamyn.
Búgingi tańda men úlken nátijelerge qol jetkizdim, men osy 549 adamnyń ishine kirdim. Men sońyna deiin barýǵa jáne ózimniń barlyq áleýetimdi kórsetýge daiynmyn».
Eske sala ketsek, Memleket tasshysy Qasym-Jomart Toqaev óziniń «Igilik barshaǵa! Sabaqtastyq. Ádildik. Órleý» sailaýaldy baǵdarlamasynda elde Prezidenttik kadrlyq rezervti qalyptastyrý qajettigin jariialady. Oǵan úmitkerlerdi irikteý 1 qyrkúiekte bastaldy.
