Memlekettik qyzmet isteri agenttigi tóraǵasynyń orynbasary Marat Dáýeshov Prezidenttik jastar kadr rezervine irikteýdiń úshinshi kezeńiniń qorytyndysyn jariialady, dep habarlaidy "Ult aqparat" vedomstvonyń baspasóz qyzmetine silteme jasap.
«Qazirgi ýaqytta Agenttik aldynda Memleket basshysynyń Prezidenttik jastar kadr rezervin (PJKR) qalyptastyrý týraly tapsyrmasyn iske asyrý mindeti tur. Qazirgi ýaqytta irikteýdiń úsh kezeńi ótti, olar: qujattardy qabyldaý, verbaldy jáne sandyq testileý jáne olardy verifikatsiialaý, sitýatsiialyq tapsyrmalardy sheshý.
Sitýatsiialyq tapsyrmalardy sheshý – bul úmitkerlerdiń sitýatsiialyq tapsyrmalar túrinde jasalǵan naqty problemalardy sheshýge kózqarasyn baǵalaý. Bul kezeń aǵymdaǵy jyldyń 12 qazanynan bastap 17 qazanyna deiin ótkizildi.
Ekinshi kezeńniń qorytyndysy boiynsha 3-kezeń – sitýatsiialyq tapsyrmalardy sheshýge 514 adam jiberildi.
Úshinshi kezeńniń qorytyndysy boiynsha 4-kezeńge 235 úmitker ótti, bul kezeń aǵymdaǵy jyldyń 25 qazanynda bastalady», - dep málimdedi Marat Dáýeshov.
Tórtinshi kezeń – bul mynadai 2 bloktan turatyn quzyretterdi baǵalaý kezeńi: assessment-ortalyq jáne quzyretter boiynsha suhbat.
Assessment-ortalyq minez-qulyq indikatorlarynyń jiyntyǵy arqyly úmitkerlerdiń strategiialyq oilaý, proaktivtilik, qyzmetti basqarý, komandalyq kóshbasshylyq, sendire bilý siiaqty quzyretterin anyqtaýǵa jáne baǵalaýǵa baǵyttalǵan. Bul blok offlain-formatta ótkiziletin bolady.
Quzyretter boiynsha suhbat Qazaqstan Respýblikasynyń kásibi HR-menedjerleriniń qatysýymen onlain-formatta júrgiziledi. Osy baǵalaý blogynyń maqsaty úmitkerlerdiń ishki ynta-jigerin jáne olardyń qundylyq baǵdarlaryn aiqyndaityn quzyretterdi anyqtaý bolyp tabylady.
Esterińizge sala keteiik, Memleket basshysynyń tapsyrmasyna sáikes Memlekettik qyzmet isteri agenttigi 2021 jyly Prezidenttik jastar kadr rezervine ekinshi irikteýdi júrgizip otyr, birinshi irikteý 2019 jyly ótken bolatyn.
Osy jylǵy irikteý qorytyndysy boiynsha rezervke 50 úmitker alynady.
Prezidenttik jastar kadr rezerviniń maqsaty qoǵamdyq jáne memlekettik múddelerdi basshylyqqa alatyn jas talanttardy anyqtaý bolyp tabylady.
