Dárigerlerdiń jalaqysyna qosylatyn prezidenttik ústemeaqy óte mańyzdy qoldaýǵa ainaldy. Bul pikirdi elordalyq ftiziopýlmonologiia ortalyǵynyń dárigeri Maral Ábdirahmanova bildirdi, dep habarlaidy QazAqparat.
«Bizdiń bólimniń ujymyna keshe Prezident tapsyrmasymen taǵaiyndalǵan ústemeaqy berildi. Ujym atynan Memleket basshysy Qasym-Jomart Toqaevqa jáne Úkimetke alǵys aitqym keledi. Barlyq dárigerler, medbikeler, odan da basqa qyzmetkerler osyndai qiyn kezeńde qarjylai kómek alyp otyr. Olar munda kúndiz-túni jumys isteidi,koronavirýstyq infektsiiamen aldyńǵy shepte kúresip júr. Meditsinalyq qyzmetkerlerdi úsh topqa bóldi, al eń joǵary qaýpite turǵan bizdiń ujymǵa 3 ai boiy 20 AEK kóleminde 850 myń teńge qosymsha tólendi. Oǵan deiin de Prezident tapsyrmasymen syiaqy túsken edi, bul meditsinalyq qyzmetkerlerdi yntalandyrady», - dedi M. Ábdirahmanova QazAqparat tilshisine bergen suhbatta.
Qalalyq ftiziopýlmonologiia ortalyǵynyń mamandaryna basqa da qoldaý kórsetilip jatyr. Olar «Hilton» qonaqúiine ýaqytsha jaiǵasty jáne barlyq taǵammen, jumysqa baryp-keletin arnaiy kólikpen qamtamasyz etildi.
Sonymen birge, dárigerler arnaiy kiim, maska, kózildirik syndy qorǵanys quraldarymen jáne immýnitetti nyǵaitatyn dárýmendermen tolyq qamtyldy.
«Ortalyqta naýqastarǵa qajetti barlyq dári-dármek bar. Ortalyq dárigerlerine úzdik klinika mamandary telefonmen jáne beinebailanyspen konsýltatsiialyq kómek beredi. Memlekettiń osyndai qoldaýy úshin qýanyshtymyz. Árine, biz de indetti eńserýge bar kúshimizdi salamyz», - dedi M. Ábdirahmanova.
Eske sala ketsek, naýryz aiynyń sońynda TJ rejimin qamtamasyz etý jónindegi Memlekettik komissiia epidemiiaǵa qarsy sharalarǵa atsalysqan meditsinalyq qyzmetkerlerge ústemeaqy taǵaiyndady.
