Nur-Sultanda 2 myńǵa jýyq meditsina qyzmetkeri jalaqysyna ústemeaqy aldy, dep habarlaidy "Ult aqparat" Nur-Sultan qalasy ákimdiginiń resmi saityna silteme jasap.
Basqarma taratqan aqparatqa qaraǵanda, tólemniń jalpy somasy 646 mln.teńgeni qurady.
Qalalyq qoǵamdyq densaýlyqty saqtaý basqarmasynyń basshysy Sáýle Qisyqovanyń aitýynsha, Nur-Sultanda 1893 meditsina qyzmetkeri eńbekaqylaryna ústemeaqy aldy. Tólemniń jalpy somasy 646 mln.teńgeni qurady jáne ol Mindetti áleýmettik meditsinalyq saqtandyrý qorynan bólindi.
«Ústemeaqy jumys istegen ýaqytyna sáikes esepteledi. Biz 10 sáýirde naýryz aiynyń jumys saǵattary boiynsha tólem jasadyq. Birinshi topta – 400 meditsina qyzmetkeri, ekinshi topta – 950 dáriger, úshinshi top boiynsha – 543 adam aldy», – dep túsindirdi basqarma basshysy.
Eske sala keteiik, QR Prezidenti janyndaǵy tótenshe jaǵdaidy qamtamasyz etý jónindegi Memlekettik komissiia Memleket basshysynyń tapsyrmasyn oryndaý aiasynda epidemiiaǵa qarsy sharalarǵa qatysqan meditsinalyq qyzmetkerlerdiń jalaqysyna ai saiyn ústemeaqy taǵaiyndaý týraly sheshimdi bekitti.
Memleket basshysynyń tapsyrmasyn oryndaý sheńberinde Nur-Sultan qalasynda epidemiiaǵa qarsy sharalarǵa qatysyp jatqan meditsina qyzmetkerlerine qarjy bólýmen ainalysatyn arnaiy komissiia quryldy.
«Qaýiptiligi asa joǵary jumystaǵy qyzmetkerler úshin ústemeaqy kólemi 20 ETJM (850 myń teńgege deiin), qaýiptiligi joǵary sanattaǵylarǵa 10 ETJM (425 myń teńge), al qaýiptiligi ortasha sanattaǵy meditsina qyzmetkerlerine 5 ETJM (212 myń teńge) qurady», – dedi «Senim» densaýlyq saqtaý júiesi qyzmetkerleriniń salalyq kəsipodaǵynyń tóraǵasy Rýslan Satypaldiev.
